"அவரை மீட்டுவிட்டோம்!" ஈரானின் மலைப்பகுதிகளில் நடந்த திக் திக் ஆபரேஷன்.. அமெரிக்க விமானி பத்திரமாக மீட்கப்பட்டதாக டிரம்ப் தகவல்
செய்தி முன்னோட்டம்
ஈரானில் நிலவி வரும் போர் பதற்றங்களுக்கு இடையே, கடந்த இரண்டு நாட்களாக மாயமாகி இருந்த அமெரிக்க விமானப்படையின் இரண்டாவது விமானி பத்திரமாக மீட்கப்பட்டுள்ளார். அமெரிக்க வரலாற்றிலேயே மிகவும் துணிச்சலான தேடுதல் மற்றும் மீட்பு நடவடிக்கைகளில் ஒன்றாகக் கருதப்படும் இந்த ஆபரேஷன் மூலம், அந்த உயரதிகாரி (கர்னல்) மீட்கப்பட்டுள்ளதாக அதிபர் டொனால்ட் டிரம்ப் தனது ட்ரூத் சோஷியல் பக்கத்தில் அதிகாரப்பூர்வமாக அறிவித்துள்ளார். ஈரானின் வான் பாதுகாப்புப் படைகளால் கடந்த வெள்ளிக்கிழமை (ஏப்ரல் 3) அமெரிக்காவின் எஃப்-15இ போர் விமானம் சுட்டு வீழ்த்தப்பட்டது. இதில் ஒரு விமானி ஏற்கனவே மீட்கப்பட்ட நிலையில், மற்றொருவரை மீட்க அமெரிக்க மற்றும் ஈரானியப் படைகளுக்கு இடையே ஒரு கடும் போட்டியே நிலவி வந்தது.
ஈரான் மலைப்பகுதி
ஈரானின் மலைப்பகுதிகளில் நடந்த திக் திக் நிமிடங்கள்
மாயமான அந்த விமானி ஈரானின் கரடுமுரடான மலைப்பகுதிகளில் எதிரிகளிடம் சிக்காமல் இரண்டு நாட்களாகத் தலைமறைவாக இருந்துள்ளார். அவரைப் பிடிப்பதற்காக ஈரானியப் படைகள் மிக நெருக்கமாகத் தேடி வந்த நிலையில், பெண்டகன் 24 மணி நேரமும் அவரைக் கண்காணித்து மீட்புப் பணிகளைத் திட்டமிட்டது. டஜன் கணக்கான அதிநவீனப் போர் விமானங்களின் பாதுகாப்புடன் அமெரிக்கப் படைகள் அந்தப் பகுதிக்குள் நுழைந்தன. மீட்பு நடவடிக்கையின் போது இரு தரப்பிற்கும் இடையே கடுமையான துப்பாக்கிச் சண்டை வெடித்தது. இந்தத் தாக்குதலில் அந்த விமானிக்குச் சில காயங்கள் ஏற்பட்டிருந்தாலும், அவர் தற்போது "சௌக்கியமாகவும் பத்திரமாகவும்" இருப்பதாக டிரம்ப் உறுதிப்படுத்தியுள்ளார். மேலும், இந்த நடவடிக்கையில் அமெரிக்கத் தரப்பில் உயிரிழப்புகளோ அல்லது காயங்களோ ஏற்படவில்லை என்றும் அவர் குறிப்பிட்டுள்ளார்.
மீண்டும் எச்சரிக்கை
ஈரானுக்கு மீண்டும் 'நரக' எச்சரிக்கை விடுத்த டிரம்ப்
விமானியை மீட்ட கையோடு ஈரானுக்கான தனது அழுத்தத்தையும் டிரம்ப் அதிகரித்துள்ளார். உலக எரிசக்தி வழித்தடமான ஹார்முஸ் ஜலசந்தியை மீண்டும் திறக்க வேண்டும் அல்லது கடுமையான விளைவுகளைச் சந்திக்க வேண்டும் என்ற தனது கோரிக்கையை அவர் மீண்டும் வலியுறுத்தியுள்ளார். ஈரானுக்கு தான் விதித்திருந்த கெடு முடிவடைய இன்னும் 48 மணி நேரமே உள்ளதைச் சுட்டிக்காட்டிய டிரம்ப், அதற்குள் உடன்பாடு எட்டப்படாவிட்டால் ஈரான் மீது "நரகமே மழையாகப் பொழியும்" என்று மிரட்டியுள்ளார். அமெரிக்காவின் இந்த வான்வழி ஆதிக்கம் ஈரானிய வான்வெளியில் தங்களுக்கு இருக்கும் மேலாதிக்கத்தை நிரூபித்துள்ளதாக அவர் பெருமிதத்துடன் தெரிவித்துள்ளார்.
ஈரானின் பதிலடி
பதிலடி கொடுக்கத் தயாராகும் ஈரான்: திறக்கப்படும் நரகத்தின் கதவுகள்
அமெரிக்காவின் இந்த அதிரடி மீட்பு நடவடிக்கைக்கு ஈரான் இதுவரை அதிகாரப்பூர்வமாகப் பதிலளிக்கவில்லை என்றாலும், அந்நாட்டின் ராணுவத் தளபதி ஜெனரல் அலி அப்துல்லாஹி அலிபாடி ஒரு கடுமையான எச்சரிக்கையை விடுத்துள்ளார். ஈரானின் உள்கட்டமைப்புகள் மீது தாக்குதல் நடத்தப்பட்டால், "உங்களுக்காக நரகத்தின் கதவுகள் திறக்கப்படும்" என்று அவர் தெரிவித்துள்ளார். மேலும், அந்தப் பிராந்தியத்தில் உள்ள அமெரிக்காவுடன் தொடர்புடைய ராணுவத் தளங்கள் மீது தாக்குதல் நடத்தப்படும் என்றும் அவர் மிரட்டியுள்ளார். கடந்த ஐந்து வாரங்களாக நீடித்து வரும் இந்தப் போரில் இதுவரை 13 அமெரிக்க வீரர்கள் உயிரிழந்துள்ளனர் மற்றும் 300க்கும் மேற்பட்டோர் காயமடைந்துள்ளனர் என்பது குறிப்பிடத்தக்கது.