'தனித்து விடப்படுவாய் பிபி': நெதன்யாகுவுக்கு டொனால்ட் டிரம்ப் பகிரங்க மிரட்டல்
செய்தி முன்னோட்டம்
மத்திய கிழக்கு பகுதியில் இஸ்ரேல் - ஈரான் இடையே ஏவுகணைப் போர் தீவிரமடைந்துள்ள சூழலில், அமெரிக்கா மற்றும் இஸ்ரேல் நாடுகளுக்கு இடையேயான அரசுமுறை உறவிலும் கடுமையான விரிசல் ஏற்பட்டுள்ளது. "இஸ்ரேல் பிரதமர் பெஞ்சமின் நெதன்யாகு தொடர்ந்து ஈரான் மீது பெரிய அளவிலான ராணுவத் தாக்குதல்களை நடத்தினால், சர்வதேச அரங்கில் இஸ்ரேல் முற்றிலும் தனிமைப்படுத்தப்படும்" என்று அமெரிக்க அதிபர் டொனால்ட் டிரம்ப் மிகக் கடுமையான எச்சரிக்கையை விடுத்துள்ளார். ஆக்ஸியோஸ் ஊடகத்திற்கு டிரம்ப் அளித்துள்ள பிரத்யேகப் பேட்டியில் இந்த தகவல் வெளியாகியுள்ளது.
எச்சரிக்கை
'உன் சொந்தப் பொறுப்பில் நீ நிற்க வேண்டியிருக்கும்': டிரம்ப் எச்சரிக்கை
ஞாயிற்றுக்கிழமை லெபனான் தலைநகர் பெய்ரூட்டில் உள்ள ஹெஸ்பொல்லா இலக்குகள் மீது இஸ்ரேல் நடத்திய வான்வழித் தாக்குதலும், அதற்குப் பதிலடியாக இஸ்ரேல் மீது ஈரான் நடத்திய பாலிஸ்டிக் ஏவுகணைத் தாக்குதலும் உலகையே பதற்றத்தில் ஆழ்த்தின. இதனைத் தொடர்ந்து நெதன்யாகுவுடன் பேசிய டிரம்ப்,"நான் பிபியிடம் மிகத் தெளிவாகக் கூறிவிட்டேன். நீங்கள் மிகவும் கவனமாக இருக்க வேண்டும். இல்லையெனில், மிக விரைவில் நீங்கள் சர்வதேச அரங்கில் யாரும் துணையின்றி தனித்து விடப்படுவீர்கள்" என்று எச்சரித்துள்ளார். ஈரானுடன் ஒரு வரலாற்றுச் சிறப்புமிக்க ராஜதந்திர அமைதி ஒப்பந்தத்தை ஏற்படுத்த டிரம்ப் கடந்த சில மாதங்களாகப் போராடி வரும் நிலையில், இஸ்ரேலின் இந்த தொடர் அத்துமீறல்கள் அமெரிக்காவை மீண்டும் ஒரு தேவையற்ற பிராந்தியப் போருக்குள் இழுத்துவிடும் என டிரம்ப் கவலை கொண்டுள்ளார்.
போர்
டிரம்பின் பேச்சைக் கேட்காத நெதன்யாகு; பதிலடி கொடுத்த ஈரான்
அமெரிக்காவின் கடுமையான எதிர்ப்பையும் மீறி, இஸ்ரேல் தங்களின் 'வரம்பிற்குட்பட்ட தாக்குதல்களை' நடத்தும் என வெள்ளை மாளிகைக்கு நெதன்யாகு தெரிவித்தார். அதன் தொடர்ச்சியாக, ஈரானின் பெட்ரோகெமிக்கல் ஆலை மீது இஸ்ரேல் வான்வழித் தாக்குதல் நடத்தியது. இதற்குப் பதிலடியாக, ஈரான் மீண்டும் ஒருமுறை இஸ்ரேலை நோக்கி ஏவுகணைகளை ஏவியது. இந்த ஏவுகணைகளை நடுவானில் அழிக்க அமெரிக்க ராணுவம் இஸ்ரேலுக்கு உதவினாலும், தாக்குதல் முடிவடைந்ததும் டிரம்ப் மீண்டும் நெதன்யாகுவை அழைத்து உடனடியாகப் போரை நிறுத்துமாறு எச்சரித்தார். இறுதியாக, ஈரான் மீண்டும் தாக்காத வரை தாங்களும் அடுத்தகட்ட தாக்குதலை நடத்த மாட்டோம் என நெதன்யாகு ஒப்புக்கொண்டுள்ளார். அரபு நாடுகளும், ஈரானிய அதிகாரிகளும் கூட இஸ்ரேல் அமைதி காத்தால் தங்களும் தாக்குதலை நிறுத்தத் தயார் என்று டிரம்பிற்குத் தூது அனுப்பியுள்ளனர்.