'செவ்வாய் இரவு 8 மணி':ஹார்முஸ் நீரிணை விவகாரத்தில் ட்ரம்ப் கொடுத்த கடைசி கெடு
செய்தி முன்னோட்டம்
ஹார்முஸ் நீரிணையை மீண்டும் திறப்பதற்கான காலக்கெடுவை அமெரிக்க அதிபர் டொனால்ட் ட்ரம்ப் மேலும் 24 மணிநேரம் நீட்டித்துள்ளார். இந்த நிபந்தனைக்கு ஈரான் இணங்கத் தவறினால், அந்நாட்டின் முக்கிய உள்கட்டமைப்புகள் மீது பேரழிவை ஏற்படுத்தும் வான்வழித் தாக்குதல்கள் நடத்தப்படும் என அவர் விடுத்துள்ள எச்சரிக்கை, மத்திய கிழக்கு பிராந்தியத்தில் போர் பதற்றத்தை உச்சத்திற்கு கொண்டு சென்றுள்ளது. தனது 'ட்ரூத் சோஷியல்' தளத்தில் பதிவிட்டுள்ள அதிபர் ட்ரம்ப், "செவ்வாய்க்கிழமை இரவு 8:00 மணி (கிழக்கு நேரப்படி)!" என்று குறிப்பிட்டு, ஈரானுக்கான இறுதி எச்சரிக்கையை விடுத்துள்ளார். முன்னதாக வழங்கப்பட்ட 48 மணிநேர காலக்கெடு முடிவடைய இருந்த நிலையில், இந்த திடீர் நீட்டிப்பு அறிவிக்கப்பட்டுள்ளது.
போர் மேகங்கள்
ஈரானின் பதிலடி மற்றும் போர் மேகங்கள்
"செவ்வாய்க்கிழமை என்பது ஈரானின் மின் நிலையங்கள் மற்றும் பாலங்களுக்கான நாள்" என்று குறிப்பிட்டுள்ள ட்ரம்ப், அந்நாட்டின் எரிசக்தி மற்றும் போக்குவரத்துத் துறைகளை இலக்கு வைக்கப் போவதாகக் கூறியுள்ளார். இந்த அச்சுறுத்தல் சர்வதேச சட்டங்களை மீறும் செயல் என மனித உரிமை ஆர்வலர்கள் மற்றும் அரசியல் விமர்சகர்கள் கவலை தெரிவித்துள்ளனர். அமெரிக்காவின் இந்த மிரட்டலுக்கு ஈரான் ராணுவத் தலைமை கடும் கண்டனம் தெரிவித்துள்ளது. அமெரிக்காவோ, இஸ்ரேலோ ஈரான் மீது தாக்குதல் நடத்தினால், அந்தப் பிராந்தியத்தில் உள்ள எண்ணெய் சுத்திகரிப்பு நிலையங்கள் மற்றும் குடிநீர் சுத்திகரிப்பு நிலையங்கள் மீது பதிலடித் தாக்குதல் நடத்தப்படும் என ஈரான் எச்சரித்துள்ளது. ஐநா சபைக்கான ஈரானிய தூதரகம், ட்ரம்ப்பின் எச்சரிக்கையை "போர்க்குற்றம் புரியும் நோக்கத்திற்கான தெளிவான சான்று" என்று சாடியுள்ளது.