போரை தீவிரப்படுத்திய இஸ்ரேல்: 24 மணி நேரத்தில் 700 பாலஸ்தீனியர்கள் பலி
செய்தி முன்னோட்டம்
தெற்கு காசாவில் நடக்கும் தாக்குதல்களை இஸ்ரேல் தீவிரப்படுத்தியதால், கடந்த 24 மணி நேரத்தில் இஸ்ரேலிய விமானத் தாக்குதல்களில் 700க்கும் மேற்பட்ட பாலஸ்தீனியர்கள் கொல்லப்பட்டதாகக் கூறப்படுகிறது.
கடந்த வெள்ளிக்கிழமை ஏழு நாள் போர்நிறுத்ததிற்கு பிறகு இஸ்ரேல் மீண்டும் குண்டுவெடிப்பைத் தொடங்கியது.
அதன் பின், ஒரே நாளில் 700 பாலஸ்தீனியர்கள் கொல்லப்பட்டுள்ளனர் என்று காசாவில் உள்ள அரசாங்க ஊடக அலுவலகத்தின் பணிப்பாளர் ஜெனரல் இஸ்மாயில் அல்-தவாப்தே கூறியுள்ளார்.
காசா பகுதியின் இரண்டாவது பெரிய நகரமான கான் யூனிஸ் மற்றும் அதைச் சுற்றியுள்ள பகுதிகளில் கடுமையான குண்டுவீச்சுகள் பதிவாகியுள்ளன.
மேலும், பொதுமக்கள் அந்த நகரத்தில் இருந்து வெளியேறி ரஃபாஜ் அல்லது மேற்கு பகுதி நோக்கி செல்லுமாறு அறிவுறுத்தப்பட்டுள்ளனர்.
ட்ஜ்வ்க்
போரை விரிவுபடுத்திய இஸ்ரேல்
இஸ்ரேலிய தாக்குதலைகளை அடுத்து, இதுவரை 1.8 மில்லியன் மக்கள் உள்நாட்டில் இடம்பெயர்ந்துள்ளனர் என்று ஐ.நா.வின் OCHA மனிதாபிமான நிறுவனம் தெரிவித்துள்ளது.
போர் தொடங்கியதில் இருந்து, 15,523 பாலஸ்தீனியர்கள் கொல்லப்பட்டுள்ளனர் என்றும், இறந்தவர்களில் 70 சதவீதம் பேர் பெண்கள் மற்றும் குழந்தைகள் என்றும் காசாவின் சுகாதார அமைச்சகம் தெரிவித்துள்ளது.
ஞாயிற்றுக்கிழமை இரவு, கான் யூனிஸ் நகரத்திலிருந்து ஒரு மைல் தொலைவில் ஹமாஸ் மற்றும் இஸ்ரேலிய படைகளுக்கு இடையே மோதல்கள் பதிவாகியுள்ளன.
காசாவின் தெற்கு பகுதியில் தாக்குதல்கள் நடைபெற்று வந்த நிலையில், தற்போது காசா முழுவதிலும் அதன் தரைப்படை நடவடிக்கையை விரிவுபடுத்தியுள்ளதாக இஸ்ரேலிய இராணுவத்தின் செய்தித் தொடர்பாளர் கூறியுள்ளார்.