இன்று இங்கிலாந்து சென்றார் பிரதமர் மோடி: FTA ஒப்பந்தத்தில் கையெழுத்து, மன்னர் சார்லஸ் உடன் சந்திப்பு
செய்தி முன்னோட்டம்
இங்கிலாந்துடன் ஒரு வரலாற்றுச் சிறப்புமிக்க சுதந்திர வர்த்தக ஒப்பந்தத்தில் (FTA) கையெழுத்திடுவது உள்ளிட்ட பல ராஜதந்திர நிகழ்ச்சிகள் கலந்துகொள்ள பிரதமர் நரேந்திர மோடி லண்டன் சென்றடைந்தார். இந்திய புலம்பெயர்ந்தோரின் உற்சாக வரவேற்புடன் இன்று அவர் அங்கே தரையிறங்கினார். தொடர்ந்து, பிரதமர் தனது சக பிரிட்டிஷ் பிரதமர் கெய்ர் ஸ்டார்மருடன் பேச்சுவார்த்தை நடத்துவார், மேலும் மன்னர் சார்லஸையும் சந்திப்பார் என கூறப்பட்டுள்ளது. பிரதமரை விமான நிலையத்தில் இந்தோ-பசிபிக் பகுதிக்குப் பொறுப்பான இங்கிலாந்து வெளியுறவு அலுவலக அமைச்சர் கேத்தரின் வெஸ்ட், இங்கிலாந்துக்கான இந்திய உயர் ஸ்தானிகர் விக்ரம் டோர்சாய்சாமி மற்றும் புது தில்லிக்கான பிரிட்டிஷ் உயர் ஸ்தானிகர் லிண்டி கேமரூன் ஆகியோர் வரவேற்றனர்.
வரவேற்பு
FTA உள்ளிட்ட ராஜதந்திர பேச்சுவார்த்தைகள் நடைபெறும்
அவரது விஜயத்தின் போது, மோடி, பிரிட்டிஷ் பிரதமர் கெய்ர் ஸ்டார்மருடன் பரந்த அளவிலான கலந்துரையாடல்களை நடத்தவும், மன்னர் சார்லஸ் III ஐ சந்திக்கவும் திட்டமிடப்பட்டுள்ளது. ஸ்டார்மர் அவரை லண்டனுக்கு அருகிலுள்ள பிரிட்டிஷ் பிரதமரின் அதிகாரப்பூர்வ இல்லமான செக்கர்ஸில் வரவேற்பார். இந்த விஜயத்தின் மையப் பகுதியாக, சுதந்திர வர்த்தக ஒப்பந்தம் (FTA) கையெழுத்திடுவதும், இந்தியா-இங்கிலாந்து விரிவான மூலோபாய கூட்டாண்மையை (CSP) மேம்படுத்துவதற்கான புதுப்பிக்கப்பட்ட உந்துதலும் இருக்கும் என்று எதிர்பார்க்கப்படுகிறது. "எங்கள் ஒத்துழைப்பு வர்த்தகம், முதலீடு, தொழில்நுட்பம், புதுமை, பாதுகாப்பு, கல்வி, ஆராய்ச்சி, நிலைத்தன்மை, சுகாதாரம் மற்றும் மக்களிடையேயான உறவுகள் உள்ளிட்ட பல்வேறு துறைகளில் பரவியுள்ளது" என்று பிரதமர் மோடி தனது பயண அறிக்கையில் தெரிவித்தார்.
வரி
வரிகளை குறைக்க பேச்சுவார்த்தைகள் நடக்கும் என எதிர்பார்ப்பு
முன்மொழியப்பட்ட வர்த்தக ஒப்பந்தத்தின் கீழ், இரு நாடுகளுக்கும் இடையே இறக்குமதி- ஏற்றுமதி மீதான வரிகளை நீக்க அல்லது குறைக்கும் முயற்சிகளை பிரதமர் மோடியின் வருகை அடிக்கோடிட்டுக் காட்டுகிறது. 2030ஆம் ஆண்டுக்குள் இரு தரப்பினரும் 120 பில்லியன் அமெரிக்க டாலர் இருதரப்பு வர்த்தக அளவை இலக்காகக் கொண்டுள்ளனர். 2023-24ஆம் ஆண்டில், இரு நாடுகளுக்கும் இடையிலான இருதரப்பு வர்த்தகம் 55 பில்லியன் அமெரிக்க டாலர்களைத் தாண்டியது. இதுவரை 36 பில்லியன் அமெரிக்க டாலர்களை முதலீடு செய்துள்ள இந்தியாவின் ஆறாவது பெரிய முதலீட்டாளராக இங்கிலாந்து உள்ளது, அதே நேரத்தில் பிரிட்டனில் உள்ள கிட்டத்தட்ட 1,000 இந்திய நிறுவனங்கள் சுமார் 1,00,000 பேரை வேலைக்கு அமர்த்தியுள்ளன. இங்கிலாந்தில் இந்திய முதலீடுகள் 20 பில்லியன் அமெரிக்க டாலர்களை நெருங்கி வருகின்றன.