"நாகரிகமே அழியும்" என்ற மிரட்டலுக்குப் பின் இறங்கி வந்த ட்ரம்ப்! போர் நிறுத்தத்தின் முழு பின்னணி
செய்தி முன்னோட்டம்
மத்திய கிழக்கில் ஆறு வாரங்களாக நீடித்து வந்த உக்கிரமான போர், ஒரு மிகப்பெரிய மனிதாபிமானப் பேரழிவின் விளிம்பில் நின்ற நிலையில், அமெரிக்க அதிபர் டொனால்ட் ட்ரம்ப் மற்றும் ஈரான் இடையே எட்டப்பட்டுள்ள இரண்டு வார காலப் போர் நிறுத்த ஒப்பந்தம் உலகிற்கு ஒரு தற்காலிக நிம்மதியை அளித்துள்ளது. அழிவுக்கும் அமைதிக்கும் இடையிலான ஒரு நூலிழைப் போராட்டத்தில், உலகம் இதுவரை கண்டிராத மிக நெருக்கடியான 90 நிமிடங்களை சந்தித்தது. ஈரான் என்ற தேசத்தையும் அதன் 90 மில்லியன் மக்களையும் "இன்று இரவோடு ஒரு நாகரிகமே அழியும்" என்று மிரட்டிய அமெரிக்க அதிபர் டொனால்ட் ட்ரம்ப், கடைசி நேரத்தில் தனது முடிவை மாற்றிக்கொண்டதன் பின்னணியில் பலஅதிரடித் திருப்பங்கள் நடந்ததாக உலக ஊடகங்கள் தெரிவிக்கின்றன.
ஈரான்
அழிவின் விளிம்பில் ஈரான்: தயாரான மனிதச் சங்கிலி
முன்னதாக நேற்று, ட்ரம்ப் விதித்த 8:00 மணி காலக்கெடு நெருங்க நெருங்க, ஈரானில் போர் அச்சம் உச்சத்தை எட்டியது. அந்நாட்டு இளைஞர் மற்றும் விளையாட்டுத்துறை அமைச்சகத்தின் அழைப்பை ஏற்று, ஆயிரக்கணக்கான மாணவர்கள், தொழிலாளர்கள் மற்றும் குடும்பங்கள் நாட்டின் முக்கிய மின் உற்பத்தி நிலையங்களைச் சுற்றி "மனிதச் சங்கிலி" அமைத்தனர். கசெரூன் (Kazerun) மின் உற்பத்தி நிலையம் போன்ற இடங்களின் வேலிகளுக்கு வெளியே நின்ற மக்கள், தங்களின் உயிரைப் பணயம் வைத்தாவது நாட்டின் உள்கட்டமைப்பைக் காக்கத் துணிந்தனர். ஒருபுறம் அமைதிப் பேச்சுவார்த்தை நடந்தாலும், இஸ்ரேல் மற்றும் அமெரிக்கப் படைகள் ஈரானின் ரயில்வே பாலங்கள் மற்றும் எண்ணெய் மையங்கள் மீது தாக்குதல்களைத் தீவிரப்படுத்திக் கொண்டிருந்தன.
மத்தியஸ்தம்
போர் நிறுத்தமும் பாகிஸ்தானின் மத்தியஸ்தமும்
ஈரான் மீதான தாக்குதலுக்கான காலக்கெடு முடிவதற்குச் சில மணிநேரங்களுக்கு முன்னதாக, பாகிஸ்தான் பிரதமர் ஷேபாஸ் ஷெரீப் விடுத்த வேண்டுகோளை ஏற்று அதிபர் ட்ரம்ப் இந்தப் போர் நிறுத்தத்திற்குச் சம்மதித்துள்ளார். இது அமெரிக்காவிற்குத் "தோல்வி அடையாமல் பின்வாங்கும்" ஒரு வாய்ப்பையும், ஈரானிற்குத் "தலைவணங்காமல் சமரசம் செய்யும்" வழியையும் காட்டியது. இதன்படி, ஏப்ரல் 7 முதல் அடுத்த 14 நாட்களுக்கு இருதரப்பும் தாக்குதல்களை நிறுத்திக்கொள்ளும். இந்த இடைவெளியில், உலகப் பொருளாதாரத்திற்கு மிக முக்கியமான ஹார்முஸ் நீரிணையை ஈரான் உடனடியாகத் திறந்துவிட வேண்டும் என்பதே முதன்மை நிபந்தனையாகும். வரும் வெள்ளிக்கிழமை முதல் பாகிஸ்தான் தலைநகர் இஸ்லாமாபாத்தில் இரு நாடுகளுக்கும் இடையே நேரடிப் பேச்சுவார்த்தைகள் தொடங்க உள்ளன.
விவாதம்
வெள்ளை மாளிகைக்குள் நடந்த விவாதம்
ஈரான் வழங்கிய 10 அம்சத் திட்டத்தை இஸ்ரேல் பிரதமர் நெதன்யாகு மற்றும் சவுதி அரேபியா உள்ளிட்ட நாடுகள் நிராகரிக்க வலியுறுத்தின. ஆனால், அமெரிக்கத் துணை அதிபர் ஜே.டி. வேன்ஸ் மற்றும் ஆலோசகர் விட்கோஃப் ஆகியோர் "கிடைக்கும் வாய்ப்பைப் பயன்படுத்திப் போரைத் தவிர்க்க வேண்டும்" என ட்ரம்ப்பிற்கு அறிவுறுத்தினர். இறுதியாக, காலக்கெடு முடிவதற்கு 90 நிமிடங்களுக்கு முன்பு, பாகிஸ்தான் பிரதமரின் வேண்டுகோளை ஏற்றுத் தாக்குதலை நிறுத்துவதாக ட்ரம்ப் அறிவித்தார்.
உதவிக்கரம்
போர்நிறுத்த அறிவிப்பிற்கு பின்னர் உதவி கரம் நீட்டிய டிரம்ப்
போர் நிறுத்தம் அறிவிக்கப்பட்ட சில மணிநேரங்களுக்குப் பிறகு, டொனால்ட் டிரம்ப், இது "உலக அமைதிக்கான ஒரு பெரிய நாள்" என்று கூறினார். ஈரானைப் போலவே, அனைவரும் போர் நிறுத்தத்தை விரும்புவதாக டிரம்ப் கூறினார். மேலும், ஹார்முஸ் ஜலசந்தியில் போக்குவரத்தை அதிகரிக்க அமெரிக்கா உதவக்கூடும் என்றும் டிரம்ப் தெரிவித்தார். "உலக அமைதிக்கான ஒரு பெரிய நாள்! ஈரான் இது நிகழ வேண்டும் என்று விரும்புகிறது, அவர்களுக்குப் போதும் என்றாகிவிட்டது! ஹார்முஸ் ஜலசந்தியில் போக்குவரத்தை அதிகரிக்க அமெரிக்கா உதவும். நிறைய நேர்மறையான நடவடிக்கைகள் இருக்கும்! பெரிய அளவில் பணம் ஈட்டப்படும்," என்று தனது சமூக ஊடகப் பதிவில் குறிப்பிட்டார். இது மத்திய கிழக்கு நாடுகளுக்கு ஒரு "பொற்காலமாக" அமையக்கூடும் என்றும் அவர் மேலும் கூறினார்.