ஜி-20 கருத்தரங்கம் நாளை சென்னையில் துவக்கம்
உலக பொருளாதாரத்தில் ஏற்படும் சிக்கல்களை தீர்க்க, வளர்ந்த நாடுகள் மற்றும் வளர்ச்சியடைந்து வரும் நாடுகளின் பொருளாதாரங்களை ஒன்றியமைப்பதற்காக 'ஜி-20' என்னும் அமைப்பு உருவாக்கப்பட்டது. இந்த அமைப்பில் அர்ஜென்டினா, ஆஸ்திரேலியா, பிரேசில், அமெரிக்கா, இந்தியா கனடா உள்ளிட்ட 20 நாடுகள் உள்ளது. இந்த அமைப்பின் 2022-23ம் ஆண்டுக்கான மாநாட்டின் தலைமை பொறுப்பினை இந்தியா ஏற்றுள்ளது. இதனால் நாடு முழுவதும் உள்ள 50 முக்கிய நகரங்களில் பல்வேறு துறைகளுடன் இணைந்து கருத்தரங்குகள் நடத்தப்படவுள்ளது. இதன்படி, ஜி-20 மாநாட்டின் கல்வி சார்ந்த கருத்தரங்கம் நாளை(ஜன.,31) சென்னையில் துவங்கி தொடர்ந்து மூன்று நாட்கள் நடைபெறவுள்ளது என்று தெரிவிக்கப்பட்டுள்ளது. இதில் 20 நாடுகள் மட்டுமின்றி ஒன்பது நட்புறவு கொண்ட நாடுகளின் பிரதிநிதிகளும் கலந்துகொள்ளவுள்ளார்கள்.
வெளிநாட்டு பிரதிநிதிகள் வருகை-அலங்கரிக்கப்பட்ட சென்னை விமான நிலையம்
நாளை(ஜன 31) துவங்கி பிப்ரவரி 2ம்தேதி வரை நடைபெறவுள்ள கல்விசார்ந்த கருத்தரங்கம் ஜி20 அமைப்பின் கல்வி பிரிவு தலைவர் சைதன்யா பிரசாத், மத்திய கல்வித்துறை இணைசெயலர் நீட்டா பிரசாத் ஆகியோர் தலைமையில் நடைபெறவுள்ளது. சென்னை ஐஐடி'யில் 31ம்தேதியும், நுங்கம்பாக்கத்தில் உள்ள நட்சத்திர ஓட்டல்களில் பிப்ரவரி 1 மற்றும் 2ம்தேதி நடக்கும் இந்த கருத்தரங்கில் பங்கேற்க வெளிநாட்டு பிரதிநிதிகள் வருகைதர ஆரம்பித்துவிட்டனர். அவர்களை வரவேற்கும் விதமாக சென்னை விமானநிலையத்தின் உள்ளே ரங்கோலி கோலம் போடப்பட்டு 'ஒரு பூமி, ஒரு குடும்பம், ஒரு எதிர்காலம்' என்னும் வாசகங்கள் எழுதப்பட்டுள்ளது. மேலும், தமிழக கலாச்சாரத்தை குறிக்கும் புகைப்படங்கள் கொண்டு அலங்காரம், வரவேற்பு வளையங்கள் ஆகியனவும் வைக்கப்பட்டுள்ளது. மேலும் இவர்கள் பாதுகாப்பிற்காக விமானநிலையத்தில் தனி கவுண்டர்கள் அமைக்கப்பட்டுள்ளது குறிப்பிடத்தக்கது.
