இங்கிலாந்து ராணியை கொல்ல முயற்சி - இந்திய வம்சாவளி நபர் ஒப்புதல் வாக்குமூலம்
இங்கிலாந்து நாட்டில் நீண்ட கால ராணியாக பதவி வகித்தவர் என்ற பெருமையை பெற்றவர் 2ம் எலிசபத் ஆவார். தனது 94 வயதில் கடந்த 2022ம்ஆண்டு செப்டம்பர் 8ம்தேதியன்று இவர் உடல்நல குறைவால் காலமானார். இதற்கிடையே, 2021ம்ஆண்டு கிறிஸ்துமஸ் பண்டிகையன்று ராணி எலிசபத்'தை கொள்வதற்காக ஒரு இளைஞர் அரசு இல்லத்திற்குள் புகுந்துள்ளார் என்று கூறப்படுகிறது. அவரை கண்ட பாதுகாப்பு பணியில் ஈடுபட்டிருந்த அதிகாரிகள் தடுத்து நிறுத்தி விசாரணை நடத்தியுள்ளார்கள். விசாரணையில் அவர் இந்திய வம்சாவளியை சேர்ந்தவர் என்றும், அவரது பெயர் ஜஸ்வந்த் சிங் சைல் என்பதும் தெரிய வந்துள்ளது. சம்பவம் நடந்த ஆண்டு அவருக்கு வயது 19, மேலும் அவர் ராணியை கொலை செய்யும் நோக்கத்துடன் தான் உள்ளே வந்ததாக ஒப்புதல் வாக்குமூலமும் அளித்துள்ளார்.
பழிவாங்கும் நோக்குடன் மேற்கொண்ட கொலை முயற்சி
மேலும் அதற்காக அவர் வில் அம்பு வடிவிலான ஆயுதம் ஒன்றினை உடன் எடுத்துவந்துள்ளார் என்பதும் கண்டறியப்பட்டது. இதனை தொடர்ந்து அவர் எதற்காக ராணியை கொல்ல முயற்சி செய்தார் என்பது குறித்த விசாரணைகள் மேற்கொள்ளப்பட்டது. தொடர்ந்து மனநல சிகிச்சைக்காக பிராட்மூர் மருத்துவமனையில் அனுமதிக்கப்பட்டார். மருத்துவமனையில் இருந்தபடியே வீடியோ இணைப்பு மூலம் நீதிமன்றத்திலும் ஆஜர்படுத்தப்பட்ட நிலையில், அவர் தான்செய்த குற்றத்தை ஒப்புக்கொண்டுள்ளார். இந்நிலையில் இந்த கொலை முயற்சி சம்பவத்திற்கு முன்னர் அந்த இளைஞர் வீடியோ ஒன்றினை பலருக்கும் அனுப்பியுள்ளார். அதன் மூலம், இந்தியாவில் 1919ம்ஆண்டு ஜாலியன் வாலாபாக் படுகொலையில் கொல்லப்பட்ட அனைத்து இந்தியர்களுக்காகவும், பழி வாங்குவதற்காக இச்செயலை செய்தது தெரியவந்துள்ளது. தற்போது அவர் மீது 1842ன் ஆண்டு தேசத்துரோக சட்டத்தின் கீழ் வழக்குப்பதிவு செய்யப்பட்டுள்ளது குறிப்பிடத்தக்கது.
