இளையோர் ஒலிம்பிக் தடகளத்தில் முதல் இந்திய பெண்: 100 மீ தடை தாண்டுதலில் சௌர்யா அம்புரே சாதனை
செய்தி முன்னோட்டம்
செனகல் நாட்டின் டக்கார் நகரில் நடைபெற்று வரும் 2026 இளைஞர் ஒலிம்பிக் போட்டியில், பெண்களுக்கான 100 மீட்டர் தடை தாண்டும் ஓட்டப் பந்தயத்தில் இந்தியாவின் சௌர்யா அம்பூரே வெண்கலப் பதக்கம் வென்று புதிய வரலாறு படைத்துள்ளார். இதன் மூலம் இளைஞர் ஒலிம்பிக் தடகள வரலாற்றில் பதக்கம் வென்ற முதல் இந்திய வீராங்கனை என்ற தனித்துவமான பெருமையை மகாராஷ்டிராவைச் சேர்ந்த இந்த 17 வயது தடகள வீராங்கனை பெற்றுள்ளார். இபா மார் டியோப் வளாகத்தில் நடைபெற்ற விறுவிறுப்பான இறுதிப் போட்டியில், அவர் பந்தய தூரத்தை 13.59 விநாடிகளில் கடந்து தனது வாழ்நாள் சிறந்த தனிநபர் நேரத்தைப் பதிவு செய்து அசத்தினார்.
ஒரே நாளில் இரண்டு முறை
தனிநபர் சாதனையை முறியடித்த சௌர்யா
இறுதிப் போட்டியில் சீனாவின் ஜாங் கெயி 13.17 விநாடிகளில் கடந்து தங்கப் பதக்கத்தையும், பிரான்சின் அன்னா பீட்டர்ஸ் 13.57 விநாடிகளில் கடந்து வெள்ளிப் பதக்கத்தையும் வென்றனர்.
முன்னதாக நடைபெற்ற இரண்டாவது அரையிறுதிப் போட்டியில் பந்தய தூரத்தை 13.77 விநாடிகளில் கடந்து இறுதிச் சுற்றுக்குத் தகுதி பெற்றிருந்த சௌர்யா, அடுத்த சில மணி நேரங்களிலேயே இறுதிப் போட்டியில் 13.59 விநாடிகளில் கடந்து ஒரே நாளில் இரண்டு முறை தனது சொந்த சாதனையை முறியடித்தார்.
கடந்த 18 மாதங்களில் ஆசிய யு-18 சாம்பியன்ஷிப், ஆசிய இளைஞர் விளையாட்டுப் போட்டிகள் மற்றும் தற்போது இளைஞர் ஒலிம்பிக் எனத் தொடர்ச்சியாக மூன்று சர்வதேசப் பதக்கங்களை வென்று தனது ஆதிக்கத்தை அவர் நிலைநாட்டியுள்ளார்.
டக்கார் இளைஞர் ஒலிம்பிக்
ஒலிம்பிக்கில் இந்தியாவின் பதக்க நிலவரம்
இத்தொடரில் தடகளப் பிரிவில் பங்கேற்ற ஒரே இந்திய வீராங்கனையான சௌர்யா வென்ற இந்த வெண்கலத்தின் மூலம், டக்கார் 2026 இளைஞர் ஒலிம்பிக்கில் இந்தியாவின் மொத்தப் பதக்க எண்ணிக்கை 3 வெள்ளி மற்றும் 5 வெண்கலப் பதக்கங்களுடன் எட்டாக உயர்ந்துள்ளது.
முன்னதாக ஜூடோவில் குஷ்பு ரஜாக்பாய் தர்ஜாதா, பேட்மிண்டனில் தன்வி பத்ரி, பீச் மல்யுத்தத்தில் தான்யா ஆகியோர் வெள்ளிப் பதக்கங்களை வென்றிருந்தனர்.
நீச்சல் பிரிவில் தினிதி தேசிங்கு இரண்டு வெண்கலப் பதக்கங்களையும், தீர்த்தங்க் பெகு மற்றும் வுஷு வீராங்கனை ராஜ்குமாரி லான்சென்பி சானு ஆகியோரும் வெண்கலப் பதக்கங்களைக் கைப்பற்றி நாட்டிற்குப் பெருமை சேர்த்துள்ளனர்.