டி20 உலகக்கோப்பை 2026: நேபாளத்தைத் தொடர்ந்து நமீபியாவையும் வீழ்த்தியது அமெரிக்கா; சூப்பர் 8 வாய்ப்பை தக்கவைத்தது

எழுதியவர் Sekar Chinnappan

Feb 15, 2026

06:58 pm

செய்தி முன்னோட்டம்

சென்னையில் உள்ள எம்.ஏ.சிதம்பரம் மைதானத்தில் இன்று (பிப்ரவரி 15, 2026) நடைபெற்ற டி20 உலகக்கோப்பை குரூப் ஏ லீக் போட்டியில், நமீபியா அணியை 31 ரன்கள் வித்தியாசத்தில் வீழ்த்தி அமெரிக்கா அபார வெற்றி பெற்றது. டி20 உலகக்கோப்பை வரலாற்றில் அமெரிக்கா தனது அதிகபட்ச ஸ்கோரை (199/4) இந்தப் போட்டியில் பதிவு செய்தது குறிப்பிடத்தக்கது. கூடுதல் விபரங்கள் இங்கே:

அமெரிக்கா

அமெரிக்காவின் அதிரடி பேட்டிங்

டாஸ் வென்று முதலில் பேட்டிங் செய்த அமெரிக்கா அணி, ஆரம்பம் முதலே நமீபியாவின் பந்துவீச்சை துவம்சம் செய்தது. தொடக்க வீரராகக் களமிறங்கிய கேப்டன் மோனாங்க் படேல் 30 பந்துகளில் 52 ரன்கள் (3 பவுண்டரி, 3 சிக்ஸர்) எடுத்து வலுவான அடித்தளம் அமைத்தார். இறுதியில் களமிறங்கிய சஞ்சய் கிருஷ்ணமூர்த்தி வெறும் 33 பந்துகளில் 68* ரன்கள் குவித்து ஆட்டமிழக்காமல் இருந்தார். இதில் 6 மெகா சிக்ஸர்கள் அடங்கும். அவர் தனது அரைசதத்தை வெறும் 23 பந்துகளில் எட்டினார். அமெரிக்கா 20 ஓவர்கள் முடிவில் 4 விக்கெட் இழப்பிற்கு 199 ரன்கள் எடுத்தது. நமீபியா தரப்பில் வில்லெம் மைபர்க் மற்றும் கேப்டன் ஜெர்ஹார்ட் எராஸ்மஸ் தலா 2 விக்கெட்டுகளைக் கைப்பற்றினர்.

நமீபியா

நமீபியாவின் போராட்டம் மற்றும் வீழ்ச்சி

200 ரன்கள் என்ற இமாலய இலக்கை நோக்கி ஆடிய நமீபியா அணிக்குத் தொடக்க வீரர்கள் லாரன் ஸ்டீன்காம்ப் மற்றும் ஜான் ஃபிரைலிங்க் 57 ரன்கள் சேர்த்து நல்ல தொடக்கம் கொடுத்தனர். ஸ்டீன்காம்ப் 58 ரன்கள் எடுத்து நம்பிக்கை கொடுத்தார். ஆனால், மிடில் ஓவர்களில் அமெரிக்காவின் ஷாட்லி வான் ஷால்க்விக் மற்றும் ஜேசன் ஹோல்டர் ஆகியோரின் கட்டுக்கோப்பான பந்துவீச்சால் விக்கெட்டுகள் சீரான இடைவெளியில் விழுந்தன. நமீபியா அணி 20 ஓவர்கள் முடிவில் 6 விக்கெட் இழப்பிற்கு 168 ரன்கள் மட்டுமே எடுத்துத் தோல்வியைத் தழுவியது. அமெரிக்கா சார்பில் ஷாட்லி வான் ஷால்க்விக் 2 விக்கெட்டுகளை வீழ்த்தினார்.

சூப்பர் 8

சூப்பர் 8 வாய்ப்பு

இந்த வெற்றியின் மூலம் அமெரிக்கா தனது குரூப் போட்டிகளை முடித்துள்ளது. தற்போது இந்தியா அல்லது பாகிஸ்தான் அணிகள் தங்களின் அடுத்தடுத்த போட்டிகளில் தொடர்ந்து தோல்வியடைந்தால் மட்டுமே அமெரிக்காவிற்கு சூப்பர் 8 சுற்றுக்கு செல்லும் வாய்ப்பு கிட்டும். மறுபுறம், நமீபியா அணி தொடர்ந்து தோல்விகளை சந்தித்ததால் இத்தொடரிலிருந்து அதிகாரப்பூர்வமாக வெளியேறியது. ஏற்கனவே குரூப் ஏ பிரிவில் நேபாளமும் வெளியேறியது குறிப்பிடத்தக்கது.