ஸ்போர்ட்ஸ் ரவுண்டு அப்: இன்றைய ட்ரெண்டிங் விளையாட்டு செய்திகள்
பெங்களூருவில் நடந்து வரும், 2-வது மகளிர் ஐபிஎல் போட்டி தொடரில் 5 அணிகள் பங்கேற்றுள்ளன. இந்த தொடரில் இன்று நடைபெறவுள்ள லீக் ஆட்டத்தில் ராயல் சேலஞ்சர்ஸ் பெங்களூர் அணியும் உ.பி.வாரியர்ஸ் அணியும் மோதவிருக்கின்றன. இதுவரை நடைபெற்ற போட்டிகளில், பெங்களூரு அணியும், உ.பி.வாரியர்ஸ் அணியும் தலா 2 வெற்றிகளையும், 2 தோல்விகளையும் பெற்றுள்ளது. இதில் பெங்களூரு அணி புள்ளிப்பட்டியலில் 4ஆம் இடத்திலும், உ.பி அணி 3ஆம் இடத்திலும் உள்ளது. அதனால் இன்று நடைபெறவுள்ள போட்டி, இரு அணிகளின் புள்ளி பட்டியலில் மாற்றத்தை தீர்மானிக்கும். இதனால், வெற்றி பெறும் நோக்கில் இரு அணிகளும் தீவிரமாக பயிற்சி செய்து வருகின்றன. இப்போட்டி, இன்று இரவு 7 :30 மணிக்கு தொடங்கவுள்ளது.
பிராக் மாஸ்டர்ஸ் செஸ் போட்டி
செக்குடியரசின் பிராக் நகரில் நடைபெற்றுவரும் பிராக் மாஸ்டர்ஸ் செஸ் போட்டியில் நேற்றைய போட்டியில், இந்திய வீரர்கள் ஆர்.பிரக்ஞானந்தா மற்றும் டி.குகேஷ் இருவரும், தத்தமது போட்டிகளை ட்ரைவில் முடிவு செய்தனர். பிரக்ஞானந்தா, செக்குடியரசின் நுயென் தான் டாயுடன் மோதினார், இப்போட்டி 40 வது நகர்வில் ட்ரைவில் முடிவடைய, குகேஷ் போட்டியிட உஸ்பெகிஸ்தானின் நோடிர்பெக் அப்துசட்டரோவுக்கு எதிரான போட்டி, 39 வது நகர்வில் ட்ரைவில் முடிவடைந்தது. மற்றொரு இந்திய வீரரான விதித் குஜராத்தியும், போலந்தின் மாட்யூஸ் பார்டெலுக்கு எதிரான போட்டியை ட்ரைவில் முடிவு செய்தார்.
ஐசிசி தரவரிசையில் முதலிடத்திற்கு முன்னேறிய இந்திய அணி
நேற்று வெளியான ஐசிசி உலக டெஸ்ட் சாம்பியன்ஷிப் தரவரிசை பட்டியலில், இந்திய அணி, முதலிடத்தை பெற்றுள்ளது. நியூஸிலாந்தில், ஆஸ்திரேலிய அணி டெஸ்ட் போட்டிகளை விளையாடி வருகிறது. இத்தொடரில், நேற்று நடைபெற்ற முதல் டெஸ்ட் போட்டியில் நியூஸிலாந்து அணியை 172 ரன்கள் வித்தியாசத்தில் ஆஸ்திரேலிய அணி வென்றது. இதனால், ஐசிசி உலகடெஸ்ட் சாம்பியன்ஷிப் தரவரிசையில் முதலிடத்தில் இருந்த நியூஸிலாந்து, 60 புள்ளிகள் பெற்று 2-வது இடத்துக்கு தள்ளப்பட்டுள்ளது. இதன்மூலம், இரண்டாம் இடத்தில் இருந்த இந்திய அணி, 64.58 புள்ளிகளுடன் தரவரிசையில் முதலிடத்துக்கு முன்னேறியுள்ளது. அதோடு, இந்த தரவரிசையில், ஆஸ்திரேலிய அணி 59.09 புள்ளிகளுடன் 3-வது இடத்தில் உள்ளது.
வாலி பால் லீக்: கொல்கத்தா அணி தோல்வி
சென்னையில் நடைபெற்று வரும், 9 அணிகள் பங்குபெறும் 3-வது பிரைம் வாலிபால் லீக் போட்டியில் நேற்று 25-வது லீக் ஆட்டம் நடைபெற்றது. இதில், கொல்கத்தா தண்டர்போல்ட்ஸ் அணியும், டெல்லி டூபான்ஸ் அணியும் மோதிக்கொண்டன. ஆட்டத்தின் தொடக்கம் முதலே அபாரமாக விளையாடிய டெல்லி அணி, 15-9, 16-14, 17-15 என்ற கணக்கில் கொல்கத்தா அணியை தோற்கடித்தது. இது டெல்லி அணிக்கு இது 4-வது வெற்றியாகும். அதேபோல, கொல்கத்தாவுக்கு 5-வது தோல்வியாகும். இதனை தொடர்ந்து இன்று, ஐதராபாத் பிளாக் ஹாக்ஸ்- பெங்களூரு டார்படோஸ் அணிகளும், சென்னை பிளிட்ஸ்- மும்பை மீட்டியார்ஸ் அணிகளும் விளையாடவுள்ளன
