
ஸ்போர்ட்ஸ் ரவுண்டு அப்: இன்றைய ட்ரெண்டிங் விளையாட்டு செய்திகள்
செய்தி முன்னோட்டம்
இந்தியாவில் சுற்றுப்பயணம் மேற்கொண்டுள்ள இங்கிலாந்து கிரிக்கெட் அணிக்கு எதிரான 3-வது டெஸ்ட் கிரிக்கெட் போட்டியில், இந்திய அணி 434 ரன்கள் வித்தியாசத்தில் வெற்றி பெற்றுள்ளது.
இதன்மூலம், இந்திய அணி, இந்தத் தொடரில் 2-1 என்ற கணக்கில் முன்னிலை பெற்றுள்ளது.
5 போட்டிகள் கொண்ட டெஸ்ட் தொடரின் முதல் போட்டியில் இங்கிலாந்து வென்ற நிலையில், 2-வது போட்டியில் இந்தியா வெற்றி அடைந்தது.
இதையடுத்து தொடர் 1-1 என்ற கணக்கில் சமநிலையில் இருந்த நிலையில் தற்போது இந்தியா வெற்றி பெற்று முன்னிலை வகிக்கிறது.
பேட்மிண்டன்
இந்திய மகளிர் அணி தங்க பதக்கத்தை வென்றது
மலேசியாவின் சிலாங்கூரின் ஷா ஆலம் பகுதியில் நடைபெற்ற ஆசிய அணிகள் பேட்மிண்டன் சாம்பியன்ஷிப் போட்டி தொடரின் இறுதி போட்டியில், தாய்லாந்தை வீழ்த்தி இந்திய மகளிர் அணி தங்க பதக்கத்தை வென்றுள்ளது.
இந்த தொடரில், இந்தியா, தாய்லாந்து, ஜப்பான், இந்தோனேசியா, தென் கொரியா, சீனா, மலேசியா ஆகிய 7 ஆசிய அணிகள் கலந்துகொண்டன.
இந்த தொடரில் நேற்று நடைபெற்ற இறுதிச்சுற்றில் இந்தியா, தாய்லாந்து அணிகள் மோதின.
இதில், 3-2 என்ற கணக்கில் இந்தியா அணி வெற்றி பெற்றது.
இந்த மகளிர் அணியை வழிநடத்தி சென்றவர் பி.வி.சிந்து ஆவார்.
டேபிள் டென்னிஸ்
உலக டேபிள் டென்னிஸ் சாம்பியன்ஷிப் குழு: இந்திய பெண்கள் அணி வெற்றி
தென் கொரியாவில் நடைபெற்று வரும், உலக டேபிள் டென்னிஸ் சாம்பியன்ஷிப் குழு போட்டியில், இந்திய பெண்கள் அணி ஹங்கேரி அணியை எதிர்த்து வெற்றி பெற்றது.
இந்தியாவின் டேபிள் டென்னிஸ் வீராங்கனை மணிகா பத்ரா முதல் போட்டியில் டோரா மதராஸை 3-2 என்ற செட் கணக்கில் வீழ்த்தி அபார வெற்றி பெற்றார்.
இதனால், ஹங்கேரி அணிக்கு எதிராக இந்திய பெண்கள் அணி 3-2 என்ற புள்ளி கணக்கில் வெற்றி பெற்றுள்ளது.
அடுத்ததாக, உஸ்பெகிஸ்தான் அணியை எதிர்த்து இந்திய அணி நாளை விளையாட உள்ளது.
கபடி
புரோ கபடி லீக்: குஜராத் ஜெயன்ட்ஸ் - ஜெய்ப்பூர் பிங்க் பாந்தர்ஸ் அணிகள் இன்று மோதல்
10-வது புரோ கபடி லீக் தொடரில் இன்று குஜராத் ஜெயன்ட்ஸ் - ஜெய்ப்பூர் பிங்க் பாந்தர்ஸ் அணிகள் மோதுகின்றன.
இந்தியாவின் பல்வேறு நகரங்களில் நடைபெற்று வரும் இந்த தொடரில், பெங்கால் வாரியர்ஸ், பெங்களூரு புல்ஸ், தபாங் டெல்லி, குஜராத் ஜெயன்ட்ஸ், அரியானா ஸ்டீலர்ஸ், ஜெய்ப்பூர் பிங்க் பாந்தர்ஸ், பாட்னா பைரேட்ஸ், புனேரி பால்டன், தமிழ் தலைவாஸ், தெலுங்கு டைட்டன்ஸ், யு மும்பா மற்றும் உ.பி.யோத்தாஸ் ஆகிய 12 அணிகள் விளையாடுகின்றன.
இந்த நிலையில் ஹரியானா மாநிலம் குருகிராமில் உள்ள நடைபெறும் இன்றைய போட்டி, இரவு 8 மணிக்கு துவங்கும்.