நியூசிலாந்து ஒருநாள் கிரிக்கெட் அணியின் கேப்டனமாக டாம் லாதம் நியமனம்
இலங்கைக்கு எதிரான மூன்று போட்டிகள் கொண்ட ஒருநாள் கிரிக்கெட் தொடருக்கான நியூசிலாந்து அணி அறிவிக்கப்பட்டுள்ளது. மார்ச் 25 முதல் 31 வரை நியூசிலாந்தின் ஆக்லாந்து, கிறிஸ்ட்சர்ச் மற்றும் ஹாமில்டனில் இந்த போட்டிகள் நடைபெறும். மேலும் நியூசிலாந்து ஒருநாள் அணிக்கு டாம் லாதம் கேப்டனாக நியமிக்கப்பட்டுள்ளார். தனது ஒருநாள் கிரிக்கெட் வாழ்க்கையில், லாதம் 123 போட்டிகளில் விளையாடி 35.02 சராசரியுடன் 3,467 ரன்கள் எடுத்துள்ளார். டாம் லாதம் அதிகபட்சமாக ஒரு இன்னிங்சில் 145 ரன்களைப் பதிவு செய்துள்ளதோடு, இதுவரை 7 சதங்கள் மற்றும் 18 அரைசதங்கள் அடித்துள்ளார்.
நியூசிலாந்து அணி வீரர்களின் முழு பட்டியல்
நியூசிலாந்து ஒருநாள் அணியில் கேன் வில்லியம்சன், டெவோன் கான்வே, மிட்செல் சான்ட்னர் மற்றும் டிம் சவுதி ஆகியோர் இடம்பெறவில்லை. நியூசிலாந்து அணி: டாம் லாதம் (கேப்டன்), ஃபின் ஆலன் (ஒரு நாள் போட்டி 1), டாம் ப்ளூன்டெல், சாட் போவ்ஸ், மைக்கேல் பிரேஸ்வெல், மார்க் சாப்மேன் (ஒரு நாள் போட்டி 2 & 3), லாக்கி பெர்குசன் (ஒரு நாள் போட்டி 1), மேட் ஹென்றி, பென் லிஸ்டர் (ஒருநாள் போட்டி 2 & 3), டேரில் மிட்செல், ஹென்றி நிக்கோல்ஸ் (ஒருநாள் போட்டி 2 & 3), க்ளென் பிலிப்ஸ் (ODI 1), ஹென்றி ஷிப்லி, இஷ் சோதி, பிளேர் டிக்னர், வில் யங்.
