சானியா மிர்சா சாதனையை உடைத்த தமிழக வீராங்கனை: 17 வயதில் மாயா ராஜேஸ்வரன் இரட்டை மகுடம்
செய்தி முன்னோட்டம்
இந்திய டென்னிஸ் அரங்கின் முடிசூடா ராணியாகத் திகழ்ந்த சானியா மிர்சாவின் 22 ஆண்டுகால அசைக்க முடியாத சாதனையை, தமிழ்நாட்டைச் சேர்ந்த 17 வயது இளம் புயல் மாயா ராஜேஸ்வரன் ரேவதி முறியடித்து புதிய சகாப்தம் படைத்துள்ளார். போர்ச்சுகல் நாட்டின் லாகோஸ் நகரில் சர்வதேச டென்னிஸ் கூட்டமைப்பு (ITF) சார்பில் நடைபெற்ற டபிள்யு35 (W35) மகளிர் டென்னிஸ் சாம்பியன்ஷிப் தொடரில், மகளிர் ஒற்றையர் மற்றும் இரட்டையர் என இரு பிரிவுகளிலுமே சாம்பியன் பட்டத்தைத் தட்டிச் சென்று உலக அரங்கில் இந்தியாவின் பெருமையை வானளவு உயர்த்தியுள்ளார்.
ஒற்றையர் பிரிவு
ஒற்றையர் இறுதி ஆட்டத்தில் நேர் செட்களில் அபார வெற்றி
மகளிர் ஒற்றையர் பிரிவுக்கான பரபரப்பான இறுதிப் போட்டியில் ஸ்பெயின் நாட்டின் முன்னணி வீராங்கனையான செர்வினோ ரூயிஸை எதிர்கொண்ட மாயா ராஜேஸ்வரன், ஆட்டத்தின் முதல் சர்வீஸ் முதலே ஆக்ரோஷமான ஆதிக்கத்தை வெளிப்படுத்தினார்.
பவர்-பேக்ட் ஷாட்கள் மூலம் எதிராளியை நிலைகுலையச் செய்த அவர், முதல் செட்டை 6-4 என்ற கணக்கில் எளிதாகக் கைப்பற்றினார்.
தொடர்ந்து நடைபெற்ற இரண்டாவது செட்டிலும் தனது துல்லியமான ஆட்டத்தை வெளிப்படுத்திய மாயா, 6-2 என்ற கணக்கில் செர்வினோ ரூயிஸை வீழ்த்தி 6-4, 6-2 என்ற நேர் செட் கணக்கில் வெற்றியை உறுதி செய்து சாம்பியன் கோப்பையை முத்தமிட்டார்.
இரட்டையர் பிரிவு
மகளிர் இரட்டையர் பிரிவில் மாயா கூட்டணி சாம்பியன்
ஒற்றையர் பிரிவைத் தொடர்ந்து நடைபெற்ற மகளிர் இரட்டையர் பிரிவு இறுதி ஆட்டத்திலும் மாயா தனது ஆதிக்கத்தைத் தொடர்ந்தார்.
உக்ரைன் வீராங்கனை எலிசவெட்டா கோட்லியருடன் ஜோடி சேர்ந்த மாயா, சீனா-இத்தாலி இணையான லியு மின் - கார்லோட்டா மொசியா ஜோடியை எதிர்கொண்டார்.
இப்போட்டியின் முதல் செட்டை 0-6 என இழந்த போதிலும், மனம் தளராமல் மீண்டு வந்த மாயா இணை இரண்டாவது செட்டை 6-2 எனக் கைப்பற்றியது.
தொடர்ந்து நடைபெற்ற விறுவிறுப்பான சூப்பர் டை-பிரேக்கரில் சிறப்பான ஆட்டத்தை வெளிப்படுத்தி 10-7 என்ற கணக்கில் புள்ளிகள் குவித்து, 0-6, 6-2, (10-7) என்ற செட் கணக்கில் த்ரில் வெற்றி பெற்று இரட்டையர் பட்டத்தையும் தட்டிச் சென்றது.
22 ஆண்டுகால சாதனை
சானியா மிர்சாவின் சாதனையை முறியடித்த இளம் சாதனைத் தாரகை
இதன் மூலம் சர்வதேச டென்னிஸ் அரங்கில் இந்திய வீராங்கனை சானியா மிர்சாவின் சாதனையை மாயா ராஜேஸ்வரன் மாற்றி எழுதியுள்ளார்.
கடந்த 2004-ஆம் ஆண்டு சானியா மிர்சா தனது 17 வயது 10 மாதங்களில் ஐ.டி.எஃப் தொழில்முறை மகளிர் ஒற்றையர் பட்டத்தை வென்றதே மிக இளம் வயது இந்திய வீராங்கனையின் சாதனையாக நீடித்து வந்தது.
தற்போது வெறும் 17 வயது 3 மாதங்களிலேயே இப்பட்டத்தை வென்றதன் மூலம், ஐ.டி.எஃப் மகளிர் தொழில்முறை தொடரில் சாம்பியன் பட்டம் வென்ற மிக இளம் வயது இந்திய வீராங்கனை என்ற வரலாற்றுப் பெருமையை மாயா ராஜேஸ்வரன் தனதாக்கியுள்ளார்.
தமிழகத்தின் இந்த இளம் டென்னிஸ் விடிவெள்ளிக்கு விளையாட்டுத் துறை பிரபலங்கள் மற்றும் ரசிகர்கள் தங்களது வாழ்த்துகளை மழையாகப் பொழிந்து வருகின்றனர்.
embed
Twitter Post
🇮🇳 Maaya Rajeshwaran becomes the youngest Indian woman to win a W35-level singles title, breaking 🇮🇳 Sania Mirza's record 🔥 The parallels are hard to miss: 📍 Both won in Lagos (Maaya in Portugal, Sania in Nigeria) 🎂 Both were 17 (Maaya 17y 3m, Sania 17y 10m) 📅 Both won in... pic.twitter.com/aU92GgjAa8— Indian Tennis Daily (ITD) (@IndTennisDaily) October 11, 2026