INDvsSA முதல் ஒருநாள் போட்டி: ஆறாம் இடத்தில் கே.எல்.ராகுல் பேட்டிங் செய்வதை உறுதி செய்தார்
செய்தி முன்னோட்டம்
ஞாயிற்றுக்கிழமை (நவம்பர் 30) தொடங்கவுள்ள இந்தியா vs தென்னாப்பிரிக்கா இடையேயான ஒருநாள் கிரிக்கெட் தொடரில், இந்திய அணியின் கேப்டன் கே.எல்.ராகுல் தனது பேட்டிங் நிலை குறித்து உறுதிப்படுத்தியுள்ளார். அணியின் வழக்கமான கேப்டன் ஷுப்மன் கில் மற்றும் துணை கேப்டன் ஷ்ரேயாஸ் ஐயர் இல்லாத நிலையில், ராகுல் அணியை வழிநடத்த உள்ளார். ராஞ்சியில் நடைபெறவுள்ள முதல் போட்டிக்கு முன்னதாகப் பேசிய கே.எல்.ராகுல், அவர் தொடர்ந்து 6ஆம் நிலையில் பேட்டிங் செய்வார் என்றும், இந்த ஆண்டின் தொடக்கத்தில் நடைபெற்ற சாம்பியன்ஸ் டிராபி முதல் அவர் இந்தப் பங்கைத் தக்க வைத்துக் கொண்டிருப்பதாகவும் உறுதிப்படுத்தினார்.
புள்ளி விபரங்கள்
ஆறாம் நிலையில் கே.எல்.ராகுலின் புள்ளி விபரங்கள்
கே.எல்.ராகுலின் புள்ளிவிவரங்கள் 5ஆம் நிலையில் வலுவாக இருந்தாலும், அணி நிர்வாகம் அவரை ஒரு ஃபினிஷராகவே தொடர்ந்து ஆதரித்து வருகிறது. கே.எல்.ராகுல் 2024இல் தான் ஆடிய 11 ஒருநாள் போட்டிகளில் 10இல் 6ஆம் நிலையில் பேட் செய்து 40.50 சராசரியில் 243 ரன்கள் எடுத்துள்ளார். இறுதி லெவன் அணி இன்னும் முடிவாகவில்லை என்றாலும், 6ஆம் நிலையில் அவரது இடம் உறுதிசெய்யப்பட்டுள்ளது. இதற்கு முன் தென்னாப்பிரிக்காவிடம் 2-0 என்ற கணக்கில் டெஸ்ட் தொடரை இழந்ததில், இந்திய கிரிக்கெட் அணியின் சுழற்பந்து வீச்சு விமர்சனத்திற்குள்ளானது. இதுகுறித்து ராகுல் பேசுகையில், சுழற்பந்து வீச்சைச் சமாளிப்பதில் உள்ள சிக்கல்களைத் தாங்கள் உணர்ந்துள்ளதாகவும், இதனை மேம்படுத்த முன்னாள் வீரர்களைத் தொடர்பு கொண்டு ஆலோசனைகள் பெறப் போவதாகவும் தெரிவித்தார்.