கேகேஆர் ரசிகர்களுக்கு அதிர்ச்சி செய்தி! ஹர்ஷித் ரானா முதல் ஆகாஷ் தீப் வரை; காயத்தால் சிதையும் கொல்கத்தாவின் வேகப்பந்து வீச்சு
செய்தி முன்னோட்டம்
ஐபிஎல் 2026 சீசன் தொடங்குவதற்கு இன்னும் சில நாட்களே உள்ள நிலையில், 2024 சாம்பியனான கொல்கத்தா நைட் ரைடர்ஸ் (கேகேஆர்) அணி பெரும் இக்கட்டான சூழலில் தள்ளப்பட்டுள்ளது. ஏற்கனவே ஹர்ஷித் ரானா காயத்தால் விலகியுள்ள நிலையில், தற்போது மற்றொரு வேகப்பந்து வீச்சாளர் ஆகாஷ் தீப் காயத்தால் இந்த சீசனிலிருந்து விலக வாய்ப்புள்ளதாகத் தகவல்கள் வெளியாகியுள்ளன. கூடுதல் விவரங்கள் இங்கே:-
தற்போதைய நிலை
ஆகாஷ் தீப்பின் காயம் மற்றும் தற்போதைய நிலை
பெங்கால் வேகப்பந்து வீச்சாளரான ஆகாஷ் தீப், தற்போது பெங்களூருவில் உள்ள பிசிசிஐயின் உயர்தர மையத்தில் சிகிச்சை பெற்று வருகிறார். 2022இல் அறிமுகமான இவர், இதுவரை 14 போட்டிகளில் விளையாடி 10 விக்கெட்டுகளை எடுத்துள்ளார். கடந்த சீசனில் லக்னோ அணியால் 8 கோடிக்கு வாங்கப்பட்ட இவர், இந்த முறை மினி ஏலத்தில் கேகேஆர் அணியால் 1 கோடி ரூபாய்க்கு ஒப்பந்தம் செய்யப்பட்டார். ஆனால், தொடர் காயங்கள் அவரது ஐபிஎல் பயணத்திற்குப் பெரும் தடையாக மாறியுள்ளன.
சோதனைகள்
கேகேஆரின் வேகப்பந்து வீச்சுப் பட்டாளம் சந்திக்கும் சோதனைகள்
கொல்கத்தா அணியின் வேகப்பந்து வீச்சுத் துறை இந்த சீசனில் மிகப்பெரிய சவால்களைச் சந்தித்து வருகிறது:- முஸ்தபிசுர் ரஹ்மான்: பிசிசிஐயின் உத்தரவின்படி இவர் அணியிலிருந்து விடுவிக்கப்பட்டுள்ளார். ஹர்ஷித் ரானா: முழங்கால் காயம் காரணமாக இந்த சீசனில் விளையாடுவது சந்தேகம். மதீஷா பதிரானா: 18 கோடி ரூபாய்க்கு வாங்கப்பட்ட 'குட்டி மலிங்கா' பதிரானா, கணுக்கால் காயத்திலிருந்து மீண்டு வந்தாலும், ஏப்ரல் பாதி வரை அவர் விளையாட முடியாது எனத் தெரிகிறது.
மாற்று வீரர்கள்
மாற்று வீரர்கள் யார்?
வேகப்பந்து வீச்சாளர்கள் அடுத்தடுத்து காயமடைவதால், கேகேஆர் நிர்வாகம் தற்போது மாற்று வீரர்களைத் தேடி வருகிறது. சிஎஸ்கே அணியின் முன்னாள் வீரர்களான சிமர்ஜீத் சிங், கே.எம்.ஆசிப் மற்றும் அனுபவ வீரர் சந்தீப் வாரியர் ஆகியோரை அணியில் இணைக்க கேகேஆர் ஆலோசித்து வருகிறது. மார்ச் 25 ஆம் தேதி மும்பை இந்தியன்ஸ் அணிக்கு எதிரான முதல் போட்டியில் விளையாட கேகேஆர் மும்பை செல்லவுள்ளது. அதற்குள் ஒரு வலுவான வேகப்பந்து வீச்சு கூட்டணியை அமைக்க வேண்டிய கட்டாயத்தில் கேகேஆர் நிர்வாகம் உள்ளது.