கைல் ஜேமிசனுக்கு பதிலாக தென்னாப்பிரிக்க வீரரை ஒப்பந்தம் செய்த சிஎஸ்கே! யார் இந்த சிசண்டா மகலா?
காயம் அடைந்த கைல் ஜேமிசனுக்கு பதிலாக தென்னாப்பிரிக்க வேகப்பந்து வீச்சாளர் சிசண்டா மகலாவை சென்னை சூப்பர் கிங்ஸ் (சிஎஸ்கே) அணி ஒப்பந்தம் செய்துள்ளது. 50 லட்சம் அடிப்படை விலையில் சிசண்டா மகலா சிஎஸ்கேவில் இணைவார். இவர் தென்னாப்பிரிக்க அணிக்காக நான்கு டி20 போட்டிகளில் விளையாடியுள்ளார். முன்னதாக கைல் ஜேமிசனை 1 கோடி ரூபாய்க்கு சிஎஸ்கே வாங்கியிருந்தது குறிப்பிடத்தக்கது. தென்னாப்பிரிக்காவின் உள்நாட்டு டி20 கிரிக்கெட்டில் சிறந்த டெத் பவுலர்களில் ஒருவராக அறியப்படும் சிசண்டா மகலா கைல் ஜேமிசனுக்கு மிகச் சிறந்த மாற்றாக இருப்பார் என எதிர்பார்க்கப்படுகிறது.
சிசண்டா மகலா டி20 புள்ளி விபரங்கள்
32 வயதான சிசண்டா மகலா டி20 கிரிக்கெட்டில் 127 போட்டிகளில் விளையாடி 8.00 என்ற எகானமியில் 136 விக்கெட்டுகளை வீழ்த்தியுள்ளார். தென்னாப்பிரிக்காவுக்காக நான்கு சர்வதேச போட்டிகளில் விளையாடி 9.85 என்ற எகானமியில் மூன்று விக்கெட்டுகளை எடுத்துள்ளார். மகலா பந்துவீச்சாளராக இருந்தாலும், 120 ஸ்ட்ரைக் ரேட்டில் இரண்டு அரைசதங்கள் அடித்துள்ளார். அவரது அதிகபட்ச ஸ்கோர் 63 ஆகும். இது அணிக்கு கூடுதல் பலமாக பார்க்கப்படுகிறது. சமீபத்தில் முடிவடைந்த எஸ்ஏ 20 லீக்கில் 8.68 என்ற எகானமியில் மகலா 14 விக்கெட்டுகளை எடுத்தார். மேலும் அதிக விக்கெட் எடுத்தவர்களில் ஐந்தாவது இடத்தைப் பிடித்தார். அவர் நெதர்லாந்திற்குச் செல்லும் தென்னாப்பிரிக்காவின் அணியில் இடம் பெறுவார் என எதிர்பார்க்கப்படுவதால், சிஎஸ்கே அணியில் சற்று காலதாமதமாக இணைவார் என எதிர்பார்க்கப்படுகிறது.
