'கோலி கோலி' என ரசிகர்கள் கோஷமிட்டத்தை ரசித்தேன் : நவீன்-உல்-ஹக்
லக்னோ சூப்பர் ஜெயன்ட்ஸ் பந்துவீச்சாளர் நவீன்-உல்-ஹக் புதன்கிழமை (மே 25) மைதானத்தில் தான் இருக்கும்போது "கோலி, கோலி" என ரசிகர்கள் எழுப்பிய கோஷங்களை ரசித்ததாகக் கூறினார். இது தனது அணிக்காக சிறப்பாக விளையாடுவதற்கான ஆர்வத்தை தனக்கு தந்ததாக அவர் மேலும் கூறினார். முன்னதாக ஐபிஎல் 2023 தொடரில் மே 1 ஆம் தேதி லக்னோ ஏகனா மைதானத்தில் ராயல் சேலஞ்சர்ஸ் பெங்களூர் மற்றும் லக்னோ சூப்பர் ஜெயன்ட்ஸ் இடையே நடந்த போட்டியில் விராட் கோலி மற்றும் நவீன்-உல்-ஹக் இடையே வாக்குவாதம் வெடித்தது. இந்த வாக்குவாதத்திற்கு பிறகு தனது இன்ஸ்டாகிராம் பதிவுகளில் தொடர்ந்து ராயல் சேலஞ்சர்ஸ் பெங்களூர் மற்றும் விராட் கோலியை சீண்டி வந்தார்.
ஐபிஎல் 2023 தொடர் குறித்து பேசிய நவீன்-உல்-ஹக்
மும்பை இந்தியன்ஸ் அணிக்கு எதிரான எலிமினேட்டர் போட்டியில் லக்னோ சூப்பர் ஜெயன்ட்ஸ் தோற்று வெளியேறிய நிலையில் போட்டிக்கு பிறகு பேசிய நவீன்-உல்-ஹக், "நான் அதை ரசிக்கிறேன். மைதானத்தில் உள்ளவர்கள் கோலி பெயரையோ அல்லது வேறு எந்த வீரரின் பெயரையோ உச்சரிப்பது எனக்குப் பிடிக்கும். இது எனது அணிக்காக நன்றாக விளையாட வேண்டும் என்ற ஆர்வத்தைத் தருகிறது. அதே சமயம் நான் வெளியில் இருந்து வரும் சத்தம் அல்லது வேறு எதிலும் கவனத்தை சிதறவிடாமல் எனது ஆட்டத்தில் மட்டுமே கவனம் செலுத்துகிறேன். கம்பீர் இந்தியாவிற்கு ஒரு ஜாம்பவான், அவருக்கு இந்தியாவில் பெரிய மரியாதை உள்ளது. ஒரு வழிகாட்டியாக, பயிற்சியாளராக, கிரிக்கெட்டின் ஜாம்பவான் என, நான் அவரை மிகவும் மதிக்கிறேன். அவரிடமிருந்து கற்றுக்கொண்டேன்." எனத் தெரிவித்துள்ளார்.
