டி20 உலகக்கோப்பை 2026: INDvsPAK போட்டி மழையினால் ரத்தானால் என்ன நடக்கும்? சூப்பர் 8 வாய்ப்பு யாருக்கு?

எழுதியவர் Sekar Chinnappan

Feb 14, 2026

02:04 pm

செய்தி முன்னோட்டம்

டி20 உலகக்கோப்பை 2026 தொடரின் மிகவும் எதிர்பார்க்கப்படும் இந்தியா vs பாகிஸ்தான் இடையிலான ஆட்டம், பிப்ரவரி 15 ஞாயிற்றுக்கிழமை அன்று கொழும்புவில் உள்ள ஆர்.பிரேமதாசா மைதானத்தில் நடைபெற உள்ளது. உலகமே ஆவலுடன் காத்திருக்கும் இந்தப் போட்டிக்கு தற்போது இயற்கை முட்டுக்கட்டை போட்டுள்ளது. வானிலை அறிக்கையின்படி, போட்டி நடைபெறும் நாளன்று மழை பெய்ய 90 சதவீதத்திற்கும் மேல் வாய்ப்புள்ளதாகத் தெரிவிக்கப்பட்டுள்ளது. இதனால் போட்டி நடைபெறுமா அல்லது மழையினால் ரத்தாகுமா என்ற கவலை ரசிகர்களிடையே எழுந்துள்ளது.

வாய்ப்பு

போட்டி ரத்தானால் என்ன நடக்கும்?

மழையினால் ஒரு பந்து கூட வீசப்படாமல் போட்டி ரத்து செய்யப்பட்டால், ஐசிசி விதிமுறைப்படி இரு அணிகளுக்கும் தலா 1 புள்ளி பகிர்ந்தளிக்கப்படும். இதன் விளைவாகப் புள்ளிப்பட்டியலில் ஏற்படும் மாற்றங்கள் இதோ: இந்திய கிரிக்கெட் அணி: 5 புள்ளிகளுடன் முதலிடத்தில் நீடிக்கும் (சிறந்த ரன் ரேட் அடிப்படையில்). பாகிஸ்தான் கிரிக்கெட் அணி: 5 புள்ளிகளுடன் இரண்டாம் இடத்தில் இருக்கும். இரு அணிகளுக்கும் தலா ஒரு புள்ளி கிடைத்தால், இந்தியா மற்றும் பாகிஸ்தான் ஆகிய இரு அணிகளும் அதிகாரப்பூர்வமாக சூப்பர் 8 சுற்றுக்குத் தகுதி பெற்றுவிடும். ஏனெனில், இந்தப் பிரிவில் உள்ள மற்ற எந்த அணியாலும் 5 புள்ளிகளை எட்ட முடியாது. இதனால் இவர்களின் அடுத்த லீக் போட்டிகள் வெறும் சம்பிரதாயப் போட்டிகளாகவே அமையும்.

ரிசர்வ் டே

ரிசர்வ் டே ஏன் இல்லை?

இந்தியா vs பாகிஸ்தான் போட்டி என்பது மிகப்பெரிய வர்த்தகம் மற்றும் உணர்வுப்பூர்வமான விஷயம் என்பதால், இதற்கு ஒரு ரிசர்வ் டே ஒதுக்கப்பட வேண்டும் என்று பல ரசிகர்கள் கோரிக்கை விடுத்துள்ளனர். இருப்பினும், ஐசிசி இதற்கு அனுமதி அளிக்கவில்லை: ஐசிசியின் அடிப்படை விதிகளின்படி, அனைத்து அணிகளும் சமமாக நடத்தப்பட வேண்டும். ஒரு குறிப்பிட்ட போட்டிக்கு மட்டும் ரிசர்வ் டே வழங்கினால், அது மற்ற அணிகளுக்கு இழைக்கப்படும் அநீதியாகக் கருதப்படும். உலகக்கோப்பை தொடரில் தினமும் போட்டிகள் நடைபெறுவதால், ஒரு போட்டிக்கு ரிசர்வ் டே ஒதுக்கினால் அது ஒட்டுமொத்தத் தொடரின் கால அட்டவணையையும், ஒளிபரப்புத் திட்டங்களையும் பாதிக்கும். தற்போதைய நிலவரப்படி, அரையிறுதி மற்றும் இறுதிப் போட்டிகளுக்கு மட்டுமே ரிசர்வ் டே ஒதுக்கப்பட்டுள்ளது என்பது குறிப்பிடத்தக்கது.