காமன்வெல்த் கியூ ஸ்போர்ட்ஸ் 2026: 13 பதக்கங்களை அள்ளி முதலிடம் பிடித்த இந்தியா
செய்தி முன்னோட்டம்
குஜராத் மாநிலம் அகமதாபாத்தில் உள்ள வீர் சாவர்க்கர் விளையாட்டரங்கில் நடைபெற்ற 'காமன்வெல்த் கியூ ஸ்போர்ட்ஸ் சாம்பியன்ஷிப் 2026' (Commonwealth Cue Sports Championships) தொடரில் இந்திய வீரர்கள் அபார ஆதிக்கத்தை வெளிப்படுத்தி வரலாற்றுச் சாதனை படைத்துள்ளனர். நான்கு நாட்கள் நடைபெற்ற இத்தொடரின் நிறைவில், 3 தங்கம், 5 வெள்ளி மற்றும் 5 வெண்கலம் என மொத்தம் 13 பதக்கங்களைக் குவித்து இந்தியா பதக்கப் பட்டியலில் முதலிடத்தைப் பிடித்து அசத்தியுள்ளது.
தங்கப் பதக்கங்கள்
ஸ்னூக்கர் மற்றும் பில்லியர்ட்ஸில் இந்திய வீரர்களின் தங்கம்
ஸ்னூக்கர் இறுதிப்போட்டியில் இந்தியாவின் ஆதித்யா சினேஹல் மேத்தா சக இந்திய வீரரான த்வாஜ் ஹரியாவை 3-0 என்ற கணக்கில் வீழ்த்தி தங்கப் பதக்கத்தைத் தட்டிச் சென்றார்.
த்வாஜ் ஹரியா வெள்ளிப் பதக்கமும், லக்ஷ்மண் சிங் ராவத் வெண்கலமும் வென்றனர். பெண்களுக்கான இங்கிலீஷ் பில்லியர்ட்ஸ் இறுதி ஆட்டத்தில் அனுபமா ராமச்சந்திரன் சக இந்திய வீராங்கனையான ரேவண்ணா உமாதேவியை 1-0 என வென்று தங்கம் வென்றார்.
அதேபோல், ஆண்களுக்கான இங்கிலீஷ் பில்லியர்ட்ஸ் பிரிவில் ராயன் ரஸ்மி, சித்தார்த் சைலேஷ் பரீக்கை வீழ்த்தி இந்தியாவிற்கு மூன்றாவது தங்கத்தைப் பெற்றுத் தந்தார்.
பதக்கப் பட்டியல்
மகளிர் ஸ்னூக்கர், ஹேபால் மற்றும் பூல் பிரிவில் கிடைத்த பதக்கங்கள்
மகளிர் ஸ்னூக்கர் பிரிவில் இறுதிப் போட்டி வரை முன்னேறிய கீர்த்தனா பாண்டியன் வெள்ளிப் பதக்கத்தையும், இஷிகா ஷா மற்றும் ஸ்ருதி லக்ஷ்மிநாராயணன் ஆகியோர் வெண்கலப் பதக்கங்களையும் வென்றனர்.
ஆண்களுக்கான ஹேபால் (Heyball) பிரிவில் பாரஸ் குப்தா வெள்ளிப் பதக்கத்தையும், உசைர் கான் வெண்கலப் பதக்கத்தையும் கைப்பற்றினர்.
மேலும், ஆண்களுக்கான 10-பால் பூல் (10-Ball Pool) பிரிவில் திவ்யா சர்மா வெண்கலப் பதக்கம் வென்று இந்திய அணிக்குப் பெருமை சேர்த்தார்.
நிறைவு விழா
பி.டி. உஷா வாழ்த்து
இந்திய பில்லியர்ட்ஸ் மற்றும் ஸ்னூக்கர் சம்மேளனத்தின் (BSFI) நூற்றாண்டு விழாக் கொண்டாட்டத்தின் ஒரு பகுதியாக, சர்வதேச அமைப்புகளின் ஆதரவுடன் முதன்முறையாக இந்தியாவில் இப்போட்டி நடத்தப்பட்டது. 40-க்கும் மேற்பட்ட நாடுகளிலிருந்து 144 முன்னணி வீரர்கள் இதில் பங்கேற்றனர்.
பரிசளிப்பு விழாவில் சிறப்பு விருந்தினராகப் பங்கேற்ற இந்திய ஒலிம்பிக் சங்கத்தின் (IOA) தலைவர் பி.டி. உஷா பதக்கங்களை வழங்கி இந்திய வீரர்களுக்குத் தனது வாழ்த்துகளைத் தெரிவித்தார்.
சொந்த மண்ணில் 13 பதக்கங்களை அள்ளியதன் மூலம் சர்வதேச கியூ ஸ்போர்ட்ஸ் அரங்கில் இந்தியாவின் அசைக்க முடியாத பலம் மீண்டும் நிரூபிக்கப்பட்டுள்ளது.