உலகக்கோப்பை வென்ற ஜெர்மனி ஹாக்கி அணி தரவரிசையில் முதலிடத்திற்கு முன்னேற்றம்!
2023 ஹாக்கி உலகக் கோப்பை சாம்பியனான ஜெர்மனி, இப்போது சர்வதேச ஹாக்கி கூட்டமைப்பு வெளியிட்ட சமீபத்திய தரவரிசையில் முதல் இடத்தில் உள்ளது. ஒடிசாவில் நடந்து முடிந்த உலகக்கோப்பை தொடருக்கு முன்பு ஜெர்மனி தரவரிசையில் நான்காவது இடத்தில் இருந்தது குறிப்பிடத்தக்கது. இதற்கிடையில், இந்திய ஆடவர் ஹாக்கி அணி ஆறாவது இடத்தில் மாறாமல் உள்ளது. பட்டியலில் நெதர்லாந்து இரண்டாம் இடத்திலும், இறுதிப்போட்டியில் ஜெர்மனியிடம் தோல்வியைத் தழுவிய பெல்ஜியம் மூன்றாம் இடத்திலும் உள்ளது. ஆஸ்திரேலியா நான்காவது இடத்திலும், இங்கிலாந்து ஐந்தாவது இடத்திலும் உள்ளது. ஆறாவது இடத்தில் இந்தியா உள்ள நிலையில், ஏழு, எட்டு, ஒன்பது மற்றும் பத்தாவது இடங்களில் முறையே அர்ஜென்டினா, ஸ்பெயின், கொரியா மற்றும் நியூசிலாந்து அணிகள் உள்ளன.
2023 உலகக்கோப்பையில் இந்திய அணியின் மோசமான செயல்திறன்
2023 ஆடவர் ஹாக்கி உலகக்கோப்பையில் போட்டியை நடத்திய இந்தியா, அர்ஜென்டினாவுடன் இணைந்து ஒன்பதாவது இடத்தைப் பிடித்து படுதோல்வியை சந்தித்துள்ளது. ஆடவர் ஹாக்கி உலகக் கோப்பையில் போட்டியை நடத்தும் ஒரு நாட்டின் மோசமான தோல்வி இதுவாகும். முன்னதாக, மலேசியா (கோலாலம்பூர் 2002) மற்றும் அர்ஜென்டினா (பியூனஸ் அயர்ஸ் 1978) ஆகிய நாடுகளும் போட்டியை நடத்தும் போது எட்டாவது இடத்தைப் பிடித்திருந்தன. இதற்கு முன்பாக 2010 ஆம் ஆண்டு டெல்லியில் நடைபெற்ற போட்டியில் எட்டாவது இடத்தைப் பிடித்து மலேசியா மற்றும் அர்ஜென்டினாவை சமன் செய்த நிலையில், தற்போது இன்னும் மோசமான சாதனையை படைத்துள்ளது.
