91 ஆண்டுகால டெஸ்ட் வரலாற்றில் முதல்முறை; 46 ரன்களுக்கு ஆல் அவுட்; மோசமான சாதனை படைத்த இந்தியா
செய்தி முன்னோட்டம்
பெங்களூரில் நடந்த நியூசிலாந்து கிரிக்கெட் அணிக்கு எதிரான முதல் டெஸ்ட் கிரிக்கெட் போட்டியில் இந்தியா மிக மோசமான ஆல் அவுட் ஆகியுள்ளது.
முன்னதாக, மழை காரணமாக புதன்கிழமை (அக்டோபர் 16) முதல் நாள் போட்டி முழுவதும் ரத்து செய்யப்பட்ட நிலையில், இரண்டாம் நாளில் இந்திய அணி டாஸ் வென்று முதலில் பேட்டிங் தேர்வு செய்து களமிறங்கியது.
எனினும், நியூசிலாந்து அணியின் பந்துவீச்சை சமாளிக்க முடியாமல் 46 ரன்களுக்கு சுருண்டது.
யஷஸ்வி ஜெய்ஸ்வால் (13 ரன்கள்) மற்றும் ரிஷப் பண்ட் (20 ரன்கள்) மட்டுமே இரட்டை இலக்கத்தில் ரன் எடுத்தனர். ஐந்து வீரர்கள் டக்கவுட் ஆகி வெளியேறினர்.
டக்கவுட்
முதல் ஏழு பேட்டர்களில் நான்கு வீரர்கள் டக்கவுட்
இதில் முதல் ஏழு பேட்டர்களில் விராட் கோலி, சர்ஃபராஸ் கான், கேஎல் ராகுல் மற்றும் ரவீந்திர ஜடேஜா ஆகியோர் ரன் ஏதும் எடுக்காமல் ஆட்டமிழந்தனர்.
இந்திய கிரிக்கெட் அணி இந்த துரதிர்ஷடமான சாதனையை இதற்கு முன்னர் இரண்டு முறை மட்டுமே செய்துள்ளது.
முதலாவதாக, 1952இல் லீட்ஸ் மைதானத்தில் இங்கிலாந்துக்கு எதிரான போட்டியின் மூன்றாவது இன்னிங்ஸிலும், அடுத்து 2014இல் அதே இங்கிலாந்துக்கு எதிரான மான்செஸ்டரில் இரண்டாவது இன்னிங்ஸிலும் இவ்வாறு இந்திய வீரர்கள் டக்கவுட் ஆகியுள்ளனர்.
அதன் பின்னர் மூன்றாவது முறையாக தற்போது பெங்களூரில் நடந்துள்ள நிலையில், இது இந்திய அணிக்கு உள்நாட்டில் 91 ஆண்டு கால டெஸ்ட் கிரிக்கெட் வரலாற்றில் முதல்முறையாகும்.