ஐபிஎல் 2023 : சிஎஸ்கே ரசிகர்களுக்கு குட் நியூஸ் சொன்ன பென் ஸ்டோக்ஸ்
செய்தி முன்னோட்டம்
சென்னை சூப்பர் கிங்ஸ் அணிக்கு மிகப்பெரிய நம்பிக்கை அளிக்கும் வகையில் பென் ஸ்டோக்ஸ் 2023 இந்தியன் பிரீமியர் லீக்கில் (ஐபிஎல்) பங்கேற்பதை உறுதிப்படுத்தியுள்ளார்.
நியூசிலாந்துக்கு எதிராக சமீபத்தில் முடிவடைந்த இரண்டு போட்டிகள் கொண்ட டெஸ்ட் தொடரின் போது இங்கிலாந்து டெஸ்ட் கேப்டன் பென் ஸ்டோக்ஸ் முழங்காளில் காயம் ஏற்பட்டது.
இதனால் இரண்டாவது டெஸ்டில் அவரால் இரண்டு ஓவர்கள் மட்டுமே வீச முடிந்தது. இந்த போட்டியில் இங்கிலாந்து ஒரு ரன் வித்தியாசத்தில் தோல்வியைத் தழுவியது.
இந்த ஆண்டு ஜூன்-ஜூலையில் ஆஷஸ் தொடர் நடைபெறவுள்ள நிலையில், முழங்கால் காயம் காரணமாக பென் ஸ்டோக்ஸ் ஐபிஎல் தொடரைத் தவிர்க்கலாம் என்று பலர் கருதினர்.
பென் ஸ்டோக்ஸ்
ஐபிஎல் பங்கேற்பை உறுதி செய்த பென் ஸ்டோக்ஸ்
2023 ஐபிஎல்லுடன் சிஎஸ்கே அணியின் கேப்டன் எம்எஸ் தோனி ஓய்வு பெறுவதாக கூறப்படும் நிலையில், அவரது இடத்தை பென் ஸ்டோக்ஸ் நிரப்புவார் என எதிர்பார்க்கப்படுகிறது.
இந்நிலையில், ஐபிஎல் இறுதிப் போட்டி மே 28இல் முடிவடையும் நிலையில், ஜூன் 1ஆம் தேதி இங்கிலாந்து அயர்லாந்துடன் டெஸ்ட் போட்டியில் விளையாட உள்ளது.
டெஸ்ட் போட்டியில் பங்கேற்க எதுவாக அவர் ஐபிஎல்லில் பாதியிலேயே வெளியேறுவார் என வெளியான செய்தி சிஎஸ்கேவுக்கு இடியை இறக்கிய நிலையில், தற்போது காயம் ஏற்பட்டதால் ஐபிஎல் தொடரை முற்றிலும் புறக்கணிப்பார் என கூறப்பட்டது.
ஆனால் சிஎஸ்கே தலைமை பயிற்சியாளர் ஸ்டீபன் ஃப்ளெமிங்குடன் தனது பணிச்சுமை குறித்து விவாதித்த ஸ்டோக்ஸ், ஐபிஎல்லில் நிச்சயம் பங்கேற்பதாக தெரிவித்துள்ளார்.