சென்னை ஓபன் டென்னிஸ் 2026: காலிறுதிக்கு முந்தைய சுற்றுக்கு முன்னேறி இந்திய வீராங்கனைகள் சாதனை
செய்தி முன்னோட்டம்
சென்னை நுங்கம்பாக்கத்தில் உள்ள தமிழ்நாடு விளையாட்டு மேம்பாட்டு ஆணைய (SDAT) மைதானத்தில் விறுவிறுப்பாக நடைபெற்று வரும் சென்னை ஓபன் 250 மகளிர் டென்னிஸ் தொடரில், இந்திய இளம் வீராங்கனைகள் மாயா ராஜேஷ்வரன் மற்றும் வைஷ்ணவி அத்கர் ஆகியோர் தங்களது முதல் சுற்று ஆட்டங்களில் சர்வதேச வீராங்கனைகளை வீழ்த்தி அடுத்த சுற்றுக்கு முன்னேறியுள்ளனர். மகளிர் ஒற்றையர் பிரிவில் வெளிப்பட்ட இந்த வெற்றிகள் மூலம், இருவரும் தங்களது விளையாட்டுப் பயணத்தின் முதல் மகளிர் டென்னிஸ் சங்க (WTA) டூர் வெற்றியைப் பதிவு செய்து ரசிகர்களை உற்சாகத்தில் ஆழ்த்தியுள்ளனர்.
தமிழக வீராங்கனை
போலந்து வீராங்கனையை வீழ்த்திய மாயா ராஜேஷ்வரன்
மகளிர் ஒற்றையர் முதல் சுற்றில், கோயம்புத்தூரைச் சேர்ந்த 17 வயதேயான இளம் வீராங்கனை மாயா ராஜேஷ்வரன் ரேவதி, உலகத் தரவரிசையில் 115-ஆம் இடத்தில் இருக்கும் போலந்தின் முன்னணி வீராங்கனையும் தொடரின் 8-ஆம் நிலை நட்சத்திரமுமான கதர்சினா கவாவை எதிர்கொண்டார்.
தொடக்கம் முதலே துல்லியமாக பந்துகளைக் கையாண்ட மாயா, முதல் செட்டை 6-4 எனக் கைப்பற்றினார்; எனினும் அனுபவ ஆட்டத்தை வெளிப்படுத்திய கதர்சினா இரண்டாவது செட்டை 6-2 என வென்று சமன் செய்தார்.
வெற்றியாளரைத் தீர்மானிக்கும் விறுவிறுப்பான மூன்றாவது செட்டில் அபாரமாக மீண்டு வந்த மாயா, டை-பிரேக்கர் வரை போராடி 7-6 என்ற கணக்கில் செட்டை வென்று, ஒட்டுமொத்தமாக 6-4, 2-6, 7-6 என்ற செட் கணக்கில் வெற்றியை உறுதி செய்தார்.
தமிழக வீராங்கனை
பிரிட்டன் வீராங்கனையை வீழ்த்திய வைஷ்ணவி அத்கர்
மற்றொரு முதல் சுற்று ஆட்டத்தில், மகாராஷ்டிராவைச் சேர்ந்த 21 வயது இந்திய வீராங்கனை வைஷ்ணவி அத்கர், பிரிட்டனின் முன்னணி வீராங்கனையான ஜோடி பர்ரேஜுடன் மோதினார்.
ஆட்டத்தின் முதல் செட்டை 3-6 என இழந்த போதிலும் மனம் தளராமல் விளையாடிய வைஷ்ணவி, அடுத்த செட்டை 6-3 என்ற கணக்கில் வசப்படுத்திப் பதிலடி கொடுத்தார்.
பரபரப்பாக அமைந்த இறுதி செட்டில் எதிராளியின் வேகமான பந்துவீச்சை நேர்த்தியாக எதிர்கொண்டு 7-5 என்ற புள்ளிக் கணக்கில் கைப்பற்றி, 3-6, 6-3, 7-5 என்ற செட் கணக்கில் போராடி வென்றார்.
இந்த வெற்றிகளைத் தொடர்ந்து இந்திய வீராங்கனைகள் இருவரும் இன்று நடைபெறும் காலிறுதிக்கு முந்தைய சுற்றில் களமிறங்குகின்றனர்.
ட்விட்டர் அஞ்சல்
Twitter Post
Pure excitement in the stands!🔥
— Sports Tamil Nadu (@SportsTN_) November 3, 2026
Moments like these are why we love the game. 🎾#SDAT #SportsTN #TNSportsDevelopment #WTA250 #tennis pic.twitter.com/0Q7sfP6Qj3