2021-22 நிதியாண்டில் ரூ.1,159 கோடி வருமான வரி செலுத்திய BCCI
செய்தி முன்னோட்டம்
2022-23 நிதியாண்டிற்கான வருமான வரித்தாக்கல் செய்வதற்கான காலக்கெடு கடந்த ஜூலை 31-ம் தேதியுடன் முடிவடைந்திருக்கிறது. இந்நிலையில், 2021-22 நிதியாண்டில் இந்திய கிரிக்கெட் கட்டுப்பாட்டு வாரியமான பிசிசிஐ (BCCI), எவ்வளவு வருமான வரி செலுத்தியது என்பது குறித்த தகவல் வெளியாகியிருக்கிறது.
மாநிலங்களவையில் இதுகுறித்து கேட்கப்பட்ட கேள்விக்கு, மத்திய துணை நிதியமைச்சர் பங்கஜ் சௌத்ரி பதிலளித்திருக்கிறார். அதில், கடந்த ஐந்து ஆண்டுகளில் பிசிசிஐ எவ்வளவு வருமான வரி செலுத்தியது என்பது குறித்த தகவல்களை அவர் தெரிவித்திருக்கிறார்.
அதன்படி 2021-22 நிதியாண்டில், ரூ.1,159 கோடி வருமான வரி செலுத்தியிருக்கிறது பிசிசிஐ. இது அதற்கு முந்தைய நிதியாண்டை விட 37% அதிகமாகும்.
பிசிசிஐ
கடந்த ஐந்து ஆண்டுகளில் பிசிசிஐ செலுத்திய வருமான வரி எவ்வளவு?
2020-21 நிதியாண்டில் ரூ.844.92 கோடிய வருமான வரியும், 2019-20 நிதியாண்டில் ரூ.882.29 கோடி வருமான வரியும், பிசிசிஐ செலுத்தியிருப்பதாகத் தெரிவித்திருக்கிறார் பங்கஜ் சௌத்ரி.
அதேபோல், 2018-19 நிதியாண்டில் 815.08 கோடியும், 2017-18 நிதியாண்டில் 596.63 கோடியும் பிசிசிஐ வருமான வரியாக செலுத்தியிருப்பதாகத் தெரிவிக்கப்பட்டுள்ளது.
மேலும், 2021-22 நிதியாண்டில் ரூ.7,606 கோடி வருவாயைப் பதிவு செய்திருக்கும் பிசிசிஐ, ரூ.3,064 கோடி செலவாகியிருப்பதாகக் கணக்குக் காட்டியிருக்கிறது.
அதேபோல், 2020-21 நிதியாண்டில் ரூ.4,735 கோடி வருவாயைப் பதிவு செய்திருந்த இந்திய கிரிக்கெட் வாரியம், ரூ.3,080 கோடி செலவு செய்யப்பட்டதாகக் கணக்குக் காட்டியிருக்கிறது.