வெஸ்ட் இண்டீஸ் தொடருக்கான இந்திய அணியில் மீண்டும் சஞ்சு சாம்சன் சேர்ப்பு
வெஸ்ட் இண்டீஸ் சுற்றுப்பயணத்தில் இந்தியா பங்கேற்கும் ஒருநாள் கிரிக்கெட் போட்டிகளில் விளையாடும் இந்திய அணியை பிசிசிஐ வெள்ளிக்கிழமை (ஜூன் 23) அறிவித்துள்ளது. இந்திய கிரிக்கெட் அணிக்கு ரோஹித் ஷர்மா கேப்டனாக தொடரும் நிலையில், அணியின் துணை கேப்டனாக ஹர்திக் பாண்டியா நியமிக்கப்பட்டுள்ளார். இந்திய அணியில் நீண்ட நாட்களுக்கு பிறகு சஞ்சு சாம்சனுக்கு மீண்டும் இடம் கொடுக்கப்பட்டுள்ளது. மேலும் ருதுராஜ் கெய்க்வாட்டும் இந்திய அணியில் இடம் பிடித்துள்ளார். சமீபத்தில் நடந்த ஐபிஎல்லில் சென்னை சூப்பர் கிங்ஸ் அணிக்காக சிறப்பாக செயல்பட்டதால், இந்த வாய்ப்பு கிடைத்துள்ளது. பந்துவீச்சில் இந்தியாவின் அதிவேக பந்துவீச்சாளரான உம்ரான் மாலிக் மற்றும் முகேஷ் குமார் ஆகியோரும் இடம் பெற்றுள்ளனர்.
இந்திய அணி வீரர்களின் பட்டியல்
இந்தியா வெஸ்ட் இண்டீஸ் கிரிக்கெட் அணியுடன் மூன்று ஒருநாள் போட்டிகளில் விளையாட உள்ளது. முதல் இரண்டு போட்டிகள் பார்படாஸின் கென்சிங்டன் ஓவல் மைதானத்தில் ஜூலை 27 மற்றும் ஜூலை 29 ஆகிய தேதிகளில் நடைபெறும் நிலையில், மூன்றாவது போட்டி ஆகஸ்ட் 1 ஆம் தேதி டிரினிடாட்டின் பிரையன் லாரா மைதானத்தில் நடைபெற உள்ளது. மேற்கிந்திய தீவுகள் தொடருக்கான இந்திய ஒருநாள் அணி : ரோஹித் ஷர்மா, ஷுப்மன் கில், ருதுராஜ் கெய்க்வாட், விராட் கோலி, சூர்ய குமார் யாதவ், சஞ்சு சாம்சன், இஷான் கிஷன், ஹர்திக் பாண்டியா, ஷர்துல் தாக்கூர், ஜடேஜா, அக்சர் படேல், யுஸ்வேந்திர சாஹல், குல்தீப் யாதவ், ஜெய்தேவ் உனட்கட், முகமது. சிராஜ், உம்ரான் மாலிக், முகேஷ் குமார்.
