வாட்ஸ்அப் பயனர்களுக்கு ஹேப்பி நியூஸ்; குரூப் சாட்களில் வந்த 4 புதிய வசதிகள்; அசத்தல் அப்டேட்
செய்தி முன்னோட்டம்
பிரபல குறுஞ்செய்தி செயலியான வாட்ஸ்அப், தனது பயனர் அனுபவத்தை மேம்படுத்தும் நோக்கில் குழு உரையாடல்களுக்கான (குரூப் சாட்கள்) நான்கு புதிய அம்சங்களை அதிகாரப்பூர்வமாக அறிவித்துள்ளது. முக்கியத் தகவல்களை எப்போதும் அணுகக்கூடிய வகையில் வைத்திருப்பது மற்றும் படிக்காத மெசேஜ்களை எளிதாகக் கண்டறிவது போன்ற பல நன்மைகளை இப்புதிய மாற்றங்கள் வழங்குகின்றன. வியாழக்கிழமை (அக்டோபர் 29) அன்று வெளியான இந்த அப்டேட்கள், உலகம் முழுவதும் உள்ள வாட்ஸ்அப் பயனர்களிடையே பெரும் வரவேற்பைப் பெற்றுள்ளன.
பழைய மெசேஜ்கள்
நிரந்தர மெசேஜ் பின் மற்றும் பழைய மெசேஜ்களைப் பகிரும் வசதி
இதுவரை வாட்ஸ்அப் குழுக்களில் ஒரு மெசேஜைக் குறிப்பிட்ட நாட்களுக்கு மட்டுமே 'பின்' செய்ய முடிந்த நிலையில், இனி காலாவதித் தேதியின்றி நிரந்தரமாக 'பின்' செய்து வைக்க முடியும்.
மேலும், ஒரு நபர் குழுவில் இணைந்த பிறகும் கூட, அவரது பெயரைத் தொட்டு சமீபத்திய பழைய மெசேஜ் வரலாற்றை (சாட் ஹிஸ்டரி) பகிரும் புதிய வசதியும் சேர்க்கப்பட்டுள்ளது.
இந்த மெசேஜ்கள் அனைத்தும் வழக்கம்போல் எண்ட்-டூ-எண்ட் என்க்ரிப்ஷன் பாதுகாப்பைக் கொண்டிருக்கும் என்பது குறிப்பிடத்தக்கது.
பிரத்யேக ஸ்டேட்டஸ் வசதி
குழுக்களுக்கான பிரத்யேக ஸ்டேட்டஸ் மற்றும் 24 மணி நேர மறைவு
பொதுவான ஸ்டேட்டஸ் தவிர்த்து, குறிப்பிட்ட குழு உறுப்பினர்கள் மட்டும் பார்க்கும் வகையில் குழு ஸ்டேட்டஸ் பதிவிடும் வசதியை வாட்ஸ்அப் அறிமுகப்படுத்தியுள்ளது.
குடும்ப உறுப்பினர்கள் அல்லது விளையாட்டுக் குழுக்கள் போன்ற குறிப்பிட்ட வட்டத்திற்கு மட்டும் தகவல்களைப் பகிர இது பெரிதும் உதவும்.
மற்ற உறுப்பினர்கள் இந்த ஸ்டேட்டஸ்களைப் பார்த்துத் தங்களது எதிர்வினைகளைப் பதிவு செய்ய முடியும்.
வழக்கமான வாட்ஸ்அப் ஸ்டேட்டஸ்களைப் போலவே, இந்த குரூப் ஸ்டேட்டஸ்களும் 24 மணி நேரத்திற்குப் பிறகு தானாக மறைந்துவிடும்.
ஃபில்டர் வசதி
படிக்காத மெசேஜ்களுக்கான புதிய ஃபில்டர் மற்றும் பயனர் நன்மைகள்
குழுக்களில் தங்களைக் குறிப்பிட்டு அல்லது தங்களது மெசேஜிற்குப் பதில் அளித்து வந்த மெசேஜ்களை மட்டும் தனியாகப் பிரித்துப் பார்க்க புதிய ஃபில்டர் வசதி சேர்க்கப்பட்டுள்ளது.
இதில் '@all' என்று குறிப்பிடப்படும் மெசேஜ்களும் அடங்கும் என்பதால், முக்கியமான தகவல்களை தவறவிடாமல் உடனுக்குடன் படிக்க முடியும்.
வாட்ஸ்அப் நிறுவனம் தொடர்ந்து குழு உரையாடல்களை மேம்படுத்தும் பணிகளில் ஈடுபட்டு வருவதாகவும், எதிர்காலத்தில் மேலும் பல புதிய மாற்றங்கள் வரும் என்றும் தெரிவித்துள்ளது.