வருமானம் போனாலும் கவலையில்லை! ஏஐ பயன்பாட்டை ஊக்குவிக்க டிசிஎஸ் புதிய வியூகம்
செய்தி முன்னோட்டம்
இந்தியாவின் மிகப்பெரிய தகவல் தொழில்நுட்ப நிறுவனமான டாடா கன்சல்டன்சி சர்வீசஸ் (டிசிஎஸ்), தனது பணியாளர்களிடம் ஒரு விசித்திரமான வேண்டுகோளை விடுத்துள்ளது. நிறுவனத்தின் வருவாய் குறைந்தாலும் பரவாயில்லை, செயற்கை நுண்ணறிவு (ஏஐ) தொழில்நுட்பத்தை மிகத் தீவிரமாகப் பயன்படுத்தி வாடிக்கையாளர்களின் செலவைக் குறைக்க உதவுங்கள் என்று டிசிஎஸ் சிஇஓ கே.கிருதிவாசன் தெரிவித்துள்ளார். மும்பையில் நடைபெற்ற நாஸ்காம் தொழில்நுட்ப மாநாட்டில் பேசிய அவர், ஏஐ மூலம் வேலையை விரைவாகவும் மலிவாகவும் செய்ய முடிந்தால், அதை வாடிக்கையாளர்களிடம் வெளிப்படையாகக் கூற வேண்டும் என்று ஊழியர்களை வலியுறுத்தினார்.
அச்சம்
20,000 ஊழியர்கள் குறைப்பு மற்றும் அச்சம்
கடந்த 2025 அக்டோபர் மாத அறிக்கைகளின்படி, ஜூலை முதல் செப்டம்பர் வரையிலான காலாண்டில் டிசிஎஸ் நிறுவனத்தின் ஊழியர்களின் எண்ணிக்கை சுமார் 19,755 வரை குறைந்துள்ளது. இது ஐடி துறையில் பெரும் கவலையை ஏற்படுத்தியுள்ளது. ஏஐ வருகையால் மனிதர்களின் வேலைவாய்ப்பு பறிபோகிறதோ என்ற அச்சம் ஊழியர்களிடையே எழுந்துள்ளது. 2026 நிதியாண்டின் இரண்டாம் காலாண்டில் டிசிஎஸ் நிறுவனத்தின் மொத்த ஊழியர் எண்ணிக்கை 5,93,314 ஆகக் குறைந்தது. இது தானியங்கி முறை மற்றும் ஏஐ தொழில்நுட்பத்தின் தாக்கம் என்று பலரால் கருதப்படுகிறது.
ஐடி பங்குகள்
சரிவடையும் ஐடி பங்குகள்
ஏஐ தொழில்நுட்பம் ஐடி துறையின் பாரம்பரிய வணிக மாதிரியை மாற்றியமைக்கும் என்ற அச்சத்தால், பங்குச்சந்தையிலும் ஐடி பங்குகள் பெரும் சரிவைச் சந்தித்துள்ளன. பிப்ரவரி மாதத்தில் மட்டும் இந்திய ஐடி நிறுவனங்களின் சந்தை மதிப்பு சுமார் 68.6 பில்லியன் டாலர் வரை குறைந்துள்ளது. நிஃப்டி ஐடி குறியீடு இந்த மாதத்தில் 21% சரிவைச் சந்தித்துள்ளது, இது கடந்த 23 ஆண்டுகளில் இல்லாத மிகப்பெரிய மாதாந்திர சரிவாகும்.
நம்பிக்கை
நிர்வாகத்தின் விளக்கம் மற்றும் நம்பிக்கை
ஊழியர்கள் எண்ணிக்கை குறைப்பு குறித்து விளக்கம் அளித்த டிசிஎஸ் மனிதவள அதிகாரி சுதீப் குன்னுமால், இது தானாக முன்வந்து விலகியவர்கள் மற்றும் கட்டாயமாக வெளியேற்றப்பட்டவர்கள் என இரு காரணிகளையும் உள்ளடக்கியது என்று கூறினார். சிஇஓ கிருதிவாசன் பேசுகையில், "ஏஐ தொழில்நுட்பம் நமது வாழ்வாதாரத்தைப் பறிக்கும் என்று நாங்கள் அஞ்சவில்லை. மாறாக, இது புதிய வாய்ப்புகளை உருவாக்கும் என்று நம்புகிறோம். மாற்றத்தை எதிர்ப்பதை விட, அதை ஏற்றுக்கொண்டு அதன் பலன்களை அனுபவிக்க வேண்டும்." என்று ஊழியர்களுக்கு நம்பிக்கை ஊட்டினார்.