நிலவின் சுற்றுவட்டப் பாதையில் நுழைந்த ரஷ்யாவின் லூனா-25
செய்தி முன்னோட்டம்
நேற்று நிலவைச் சுற்றி வரும் சந்திரயான்-3யின் கடைசி சுற்றுவட்டப்பாதை உயரக் குறைப்பு நடவடிக்கையை வெற்றிகரமாக மேற்கொண்டது இஸ்ரோ. அதனைத் தொடர்ந்து, நிலவை 153 கிமீ சுற்றுவட்டப்பாதையில் சுற்றி வந்து கொண்டிருக்கிறது சந்திரயான்-3.
இந்நிலையில், கடந்த ஆகஸ்ட் 11-ம் தேதி விண்ணில் ஏவப்பட்ட ரஷ்யாவின் லூனா-25 விண்கலமும் தற்போது நிலவின் சுற்றுவட்டப்பாதையில் நுழைந்திருக்கிறது.
விண்ணில் ஏவப்பட்டதில் இருந்து ஐந்து நாட்களில் நிலவின் சுற்றுவட்டப்பாதையில் நுழைந்திருக்கிறது லூனா-25. 1976 ஏவப்பட்ட லூனா-24க்குப் பிறகு, கிட்டத்தட்ட 50 ஆண்டுகளுக்குப் பிறகு அடுத்த நிலவுத் திட்டத்தை செயல்படுத்தியிருக்கிறது ரஷ்யா.
கடந்த ஆகஸ்ட் 15-ல் விண்வெளியில் இருந்தபடியே பல்வேறு புகைப்படங்களை பூமிக்கு அனுப்பியிருக்கிறது லூனா-25 விண்கலம்.
ரஷ்யா
ரஷ்யாவின் திட்டம் என்ன?
அடுத்த ஐந்து நாட்கள் நிலவின் சுற்றுவட்டப்பாதையில் சுற்றி வரவிருக்கும் லூனா-25, ஆகஸ்ட் 21-ம் தேதி நிலவின் தென்துருவப்பகுதியில் தரையிறங்கவிருக்கிறது.
சந்திரயான்-3 தரையிறங்கும் பகுதியிலிருந்து, சுமார் 100 முதல் 120 கிமீ தொலைவில் லூனா-25வை தரையிறக்கத் திட்டமிட்டிருக்கிறது ரஷ்யா. நிலவில் ஒரு வருடக்காலம் ஆராய்ச்சிகளை மேற்கொள்ளவிருக்கிறது லூனா-25.
நிலவின் மேற்பரப்பில் உள்ள தனிமங்கள், நிலவின் வளிமண்டலத்தில் உள்ள பிளாஸ்மா மற்றும் துகள்கள் மற்றும் நிலவின் மேற்பரப்பிற்கு அடியில் உறைநிலையில் இருக்கும் தண்ணீர் ஆகியவற்றை ஆய்வு செய்யவிருக்கிறது லூனா-25.
ஆகஸ்ட் 21-ல் தென்துருவப் பகுதியில் லூனா 25 வெற்றிகரமாகத் தரையிறங்கும் பட்சத்தில், நிலவின் தென்துருவத்தில் மென் தரையிறங்கும் முதல் நாடு என்ற பெயரை ரஷ்யா பெறும்.