எந்த துறையும் விலக்கல்ல; அடுத்த 12 மாதங்களில் பெரும்பாலான ஒயிட்காலர் வேலைகள் ஏஐ வசம் சென்றுவிடும்
செய்தி முன்னோட்டம்
மைக்ரோசாஃப்ட் நிறுவனத்தின் செயற்கை நுண்ணறிவு (ஏஐ) பிரிவுத் தலைவர் முஸ்தபா சுலைமான், அடுத்த 12 முதல் 18 மாதங்களுக்குள் கணினி முன்னமர்ந்து வேலை செய்யும் ஒயிட்காலர் (White-collar) பணியாளர்களின் பெரும்பாலான வேலைகளை ஏஐ முழுமையாக செய்யும் என்று தெரிவித்துள்ளார். வக்கீல்கள், கணக்காளர்கள், திட்ட மேலாளர்கள் மற்றும் சந்தைப்படுத்துபவர்கள் போன்றோரின் அன்றாடப் பணிகளை AI தானியங்கி மயமாக்கும் காலம் வெகுதொலைவில் இல்லை என்று அவர் எச்சரித்துள்ளார்.
ஏஜிஐ
புரொபஷனல் கிரேடு ஏஜிஐ
ஃபினான்சியல் டைம்ஸ் இதழுக்கு அளித்த பேட்டியில், மைக்ரோசாஃப்ட் நிறுவனம் "புரொபஷனல் கிரேடு ஏஜிஐ" (Professional-grade AGI) என்ற புதிய தொழில்நுட்பத்தை நோக்கி நகர்வதாக அவர் கூறியுள்ளார். இதன் மூலம், ஒரு தொழில்முறை நிபுணர் செய்யக்கூடிய அனைத்து வேலைகளையும் இந்த ஏஐ மாடல்கள் செய்ய முடியும். அறிவுசார் பணியாளர்கள் (Knowledge workers) செய்யும் வழக்கமான பணிகளை இந்த கருவிகள் எளிதில் கையாளும். கணினி திரை முன்னமர்ந்து பணியாற்றும் எவரும் இந்த மாற்றத்தால் பாதிக்கப்பட வாய்ப்புள்ளதாக அவர் சுட்டிக்காட்டியுள்ளார்.
பாட்காஸ்ட்
பாட்காஸ்ட் போல ஏஐ மாடல் தயாரிப்பு
எதிர்காலத்தில் ஒரு புதிய ஏஐ மாடலை உருவாக்குவது என்பது ஒரு பிளாக் (Blog) எழுதுவது அல்லது பாட்காஸ்ட் (Podcast) உருவாக்குவது போல எளிதாகிவிடும் என்று சுலைமான் கருதுகிறார். ஒவ்வொரு நிறுவனம் மற்றும் தனிநபரின் தேவைக்கேற்ப ஏஐ மாடல்களை வடிவமைக்க முடியும். அடுத்த 2 முதல் 3 ஆண்டுகளில், பெரிய நிறுவனங்களின் பணிப்பாய்வுகளை (Workflow) நிர்வகிப்பதில் ஏஐ ஏஜெண்டுகள் மிகச் சிறப்பாக செயல்படும் என்று நிபுணர்கள் எதிர்பார்க்கின்றனர்.
ஓபன்ஏஐ
மைக்ரோசாஃப்ட் - ஓபன்ஏஐ உறவில் மாற்றம்
தற்போது ஓபன்ஏஐ நிறுவனத்தை அதிகம் சார்ந்திருக்கும் மைக்ரோசாஃப்ட், இனி தனது சொந்த ஏஐ மாடல்களை உருவாக்குவதில் அதிக கவனம் செலுத்தப் போவதாக அவர் மறைமுகமாகத் தெரிவித்துள்ளார். "ஏஐ துறையில் மைக்ரோசாஃப்ட் சுயசார்பு அடைய வேண்டிய தருணம் இது." என்று அவர் கூறியுள்ளார். மைக்ரோசாஃப்டின் இந்த புதிய ஏஐ மாடல்கள் 2026 ஆம் ஆண்டில் அறிமுகமாகலாம் என்று எதிர்பார்க்கப்படுகிறது.
தாக்கம்
சந்தையில் ஏற்பட்டுள்ள தாக்கம்
சமீபத்தில் ஆந்த்ரோபிக் நிறுவனத்தின் 'கிளாட் கோவர்க்' (Claude Cowork) அறிமுகமானது, இன்போசிஸ் மற்றும் டிசிஎஸ் போன்ற மென்பொருள் சேவை நிறுவனங்களின் (SaaS) பங்குகளில் பெரும் சரிவை ஏற்படுத்தியது. இந்தச் சூழலில் முஸ்தபா சுலைமானின் கருத்துக்கள் தகவல் தொழில்நுட்பத் துறையில் பெரும் விவாதத்தை ஏற்படுத்தியுள்ளன.