"இதற்குத்தானே ஆசைப்பட்டோம்!" இன்ஸ்டாகிராமில் வந்தாச்சு கமெண்ட் எடிட்டிங் வசதி; ஆனால் ஒரு கண்டிஷன்
செய்தி முன்னோட்டம்
சமூக வலைதள ஜாம்பவானான மெட்டா நிறுவனத்திற்கு சொந்தமான இன்ஸ்டாகிராம், தனது பயனர்களுக்கு ஒரு மகிழ்ச்சியான செய்தியை வெளியிட்டுள்ளது. இதுவரை இன்ஸ்டாகிராமில் ஒரு கமெண்ட் பதிவிட்ட பிறகு, அதில் ஏதேனும் எழுத்துப்பிழையோ அல்லது கருத்தில் மாற்றமோ இருந்தால், அந்த கமெண்ட்டை டெலீட் செய்துவிட்டு மீண்டும் புதிதாகப் பதிவிட வேண்டிய கட்டாயம் இருந்தது. ஆனால், இனி அந்த கவலை தேவையில்லை. மற்ற சமூக வலைதளங்களைப் போலவே, இன்ஸ்டாகிராமிலும் இப்போது பதிவிட்ட கமெண்ட்களை எடிட் செய்யும் வசதி அதிகாரப்பூர்வமாக அறிமுகப்படுத்தப்பட்டுள்ளது. இதன் மூலம் பயனர்கள் தங்களது கருத்துக்களை மிகவும் துல்லியமாகவும் பிழையின்றியும் பதிவிட முடியும்.
15 நிமிட அவகாசம்
இது எப்படி செயல்படுகிறது?
இந்த புதிய வசதியின் கீழ், ஒரு கமெண்ட்டை பதிவிட்ட பிறகு அடுத்த 15 நிமிடங்கள் வரை மட்டுமே அதனை எடிட் செய்ய முடியும். இந்த 15 நிமிட கால அவகாசத்திற்குள் நீங்கள் எத்தனை முறை வேண்டுமானாலும் உங்கள் கமெண்ட்டை மாற்றிக்கொள்ளலாம். உங்கள் கமெண்ட்டின் கீழே உள்ள 'Edit' பட்டனை அழுத்தி, தேவையான மாற்றங்களை செய்த பிறகு 'Blue Checkmark' ஐ கிளிக் செய்தால் போதும். 15 நிமிடங்கள் கடந்த பிறகு இந்த எடிட் ஆப்ஷன் தானாகவே மறைந்துவிடும். உரையாடல்கள் தவறாக சித்தரிக்கப்படுவதைத் தவிர்க்கவே இந்த கால வரம்பு விதிக்கப்பட்டுள்ளதாகக் கூறப்படுகிறது.
சில நிபந்தனைகள்
எவற்றையெல்லாம் மாற்றலாம்?
இந்த புதிய அப்டேட்டில் கமெண்ட்டில் உள்ள எழுத்துக்களை மட்டுமே மாற்ற முடியும். நீங்கள் ஒரு கமெண்ட்டில் புகைப்படங்கள், ஜிஃப் அல்லது ஸ்டிக்கர்களைப் பயன்படுத்தியிருந்தால், அவற்றை மாற்ற முடியாது. ஒரு கமெண்ட் எடிட் செய்யப்பட்ட பிறகு, அதன் அருகில் சாம்பல் நிறத்தில் 'Edited' என்ற குறிப்புத் தோன்றும். இதன் மூலம் மற்றவர்கள் அந்த கமெண்ட் மாற்றப்பட்டுள்ளது என்பதைத் தெரிந்துகொள்ளலாம். இருப்பினும், எடிட் செய்யப்படுவதற்கு முன்னால் அந்த கமெண்ட் எப்படி இருந்தது என்ற பழைய வரலாற்றை மற்றவர்களால் பார்க்க முடியாது என்பது குறிப்பிடத்தக்கது.
அறிமுகம்
உலகளாவிய அறிமுகம் மற்றும் பிற மாற்றங்கள்
இந்த வசதி தற்போது உலகம் முழுவதும் உள்ள இன்ஸ்டாகிராம் பயனர்களுக்குப் படிப்படியாக வழங்கப்பட்டு வருகிறது. த்ரெட்ஸ் மற்றும் மெசஞ்சர் போன்ற மெட்டாவின் பிற செயலிகளில் ஏற்கனவே எடிட் வசதி உள்ள நிலையில், இப்போது இன்ஸ்டாகிராமிலும் இது கொண்டுவரப்பட்டுள்ளது. இதனுடன் கூடுதலாக, 13 வயதுக்கு மேற்பட்ட டீன்-ஏஜ் பயனர்களுக்கான உள்ளடக்கக் கட்டுப்பாடுகள் குறித்த புதிய வழிகாட்டுதல்களையும் இன்ஸ்டாகிராம் வெளியிட்டுள்ளது. இந்த கமெண்ட் எடிட்டிங் வசதி குறித்துப் பயனர்கள் பலரும் "இதற்குத் தான் நீண்ட நாட்களாகக் காத்திருந்தோம்" எனப் பாசிட்டிவான கருத்துக்களைத் தெரிவித்து வருகின்றனர்.