ட்விட்டருக்கு போட்டியாக 'Threads' வலைத்தளைத்தை அறிமுகப்படுத்தும் இன்ஸ்டாகிராம்
செய்தி முன்னோட்டம்
ட்விட்டருக்குப் போட்டியாக 'ப்ராஜெக்ட் 92' என்ற குறியீட்டுப் பெயரில் புதிய சமூக வலைத்தளம் ஒன்றை உருவாக்கி வந்தது இன்ஸ்டாகிராம். அந்த வலைத்தளத்தை வரும் ஜூலை 6-ம் தேதி அந்நிறுவனம் அறிமுகப்படுத்தவிருப்பதாகத் தற்போது தகவல் வெளியாகியிருக்கிறது.
குறைந்து வரும் ட்விட்டரின் வருவாயைப் பெருக்கும் நோக்கத்தோடு, அத்தளத்தில் பல்வேறு புதிய கட்டுப்பாடுகளை விதித்து, புதிய மாற்றங்களையும் அறிமுகப்படுத்தி வருகிறார் அந்நிறுவனத்தின் நிர்வாகத் தலைவரான எலான் மஸ்க்.
இந்த புதிய மாற்றங்கள் யாவும், அந்நிறுவனத்தின் சந்தா கட்டண சேவை முறையை மையப்படுத்தியே அறிமுகப்படுத்தப்பட்டு வருகிறது. இதனால், சந்தா செலுத்தாத இலவச ட்விட்டர் பயனர்களின் சேவைத் தரம் வெகுவாக பாதிக்கப்பட்டிருக்கிறது.
இன்ஸ்டாகிராம்
ட்விட்டருக்கு மாற்றான புதிய வலைத்தளம்:
ட்விட்டரின் இந்தக் குழப்பங்களைப் பயன்படுத்தி, அதற்கு மாற்றான புதிய சேவையை நிலைநிறுத்த முயற்சி செய்கிறது மெட்டா.
எனவே, இன்ஸ்டாகிராமை அடிப்படையாகக் கொண்ட ட்விட்டருக்கு போட்டியான 'த்ரெட்ஸ்' (Threads) என்ற சமூக வலைத்தளத்தை உருவாக்கியிருக்கிறது அந்நிறுவனம்.
சில நாட்களுக்கு முன்பு இந்த புதிய சமூக வலைத்தளம் தவறுதலாக கூகுள் பிளே ஸ்டோரில் பட்டியலிடப்பட்டு இணையவாசிகளிடையே பேசு பொருளானது. மேலும், அத்தளம் எப்படி இருக்கும் என்பது குறித்த ஸ்கீரின்ஷாட்களும் இணையத்தில் கசிந்து பலராலும் பகிரப்பட்டு வருகிறது.
இதனைத் தொடர்ந்தே, தற்போது புதிய சமூக வலைத்தளத்தை அதிகாரப்பூர்வமாக வெளியிடவிருப்பதாகத் தகவல் வெளியாகியிருக்கிறது.