ஆன்லைன் விற்பனை மருந்துகளுக்கு அதிரடி தடை! புதிய சட்டம் என்ன?
இந்தியாவில் உற்பத்தி செய்யப்படும் மருந்துகள் இந்தியாவில், மட்டுமல்லாமல் அமெரிக்கா, ஐரோப்பா, ரஷ்யா, ஆப்பிரிக்கா உள்பட உலகம் முழுவதும் பல்வேறு பகுதிகளுக்கு ஏற்றுமதி செய்யப்படுகின்றன. இவை, பார்மஸி கடைகளில் மருந்துகள் விற்பனை செய்யப்படுவது மட்டுமல்லாமல் ஆன்லைனிலும் சில நிறுவனங்கள் மருந்துகளை விற்பனை செய்து வருகின்றன. அதன்படி, Tata 1mg, Flipkart, Amazon, NetMeds, MediBuddy போன்ற நிறுவனங்கள் ஆன்லைனில் மருந்துகளை விற்பனை செய்கின்றன. இந்த நிலையில், ஆன்லைன் மருந்து விற்பனைக்கு முழு தடை விதிக்க அரசு திட்டமிட்டு வருவதாக கூறப்படுகிறது. இதனால், மேற்கூறிய நிறுவனங்களின் ஆன்லைன் மருந்து தொழில் முற்றிலுமாக முடங்குவதற்கும் வாய்ப்பு இருக்கிறது.
ஆன்லைன் மருந்து விற்பனை செய்ய தடை - அரசு அதிரடி
மேலும், மருந்துகள் விற்பனைக்கு தற்போது மருந்துகள் மற்றும் காஸ்மெட்டிக்ஸ் சட்டம் (1940) அமலில் இருக்கிறது. தொடர்ந்து, இதற்கு பதிலாக புதிய மருந்துகள், மருத்துவ கருவிகள், காஸ்மெடிக்ஸ் சட்டத்துக்கான (2023) வரைவு மசோதாவை மத்திய அரசு ஏற்கனவே வெளியிட்டுள்ளது. அதனால், எந்த ஒரு நபரும், அல்லது ஒரு நபர் சார்பில் மற்றவரும் ஆன்லைனில் மருந்துகளை விற்பனை செய்வதற்காக மருந்துகளை வாங்கவோ, சேமித்து வைக்கவோ, காட்சிப்படுத்தவோ, விற்பனை செய்யவோ தடை விதிக்கப்பட்டுள்ளது. இதற்கான உரிய உரிமமும், அனுமதியும் பெற்ற பின் ஆன்லைனில் மருந்துகளை விற்பனை செய்யலாம். எனவே, ஆன்லைனில் மருந்துகளை விற்பனை செய்யும் நிறுவனங்களுக்கு மத்திய அரசு நோட்டீஸ் அனுப்பியுள்ளது.
