தங்களது முதல் ஃபோல்டபிள் போன்.. டீசர் வெளியிட்டது கூகுள்!
கடந்த சில மாதங்களாகவே கூகுளின் ஃபோல்டபிள் ஸ்மார்ட்போன் குறித்த தகவல்கள் நிறைய கசிந்து வந்தது. கூகுளின் வருடாந்திர I/O மாநாட்டில் இந்த போன் வெளியிடப்படும் எனத் தகவல் வெளியான நிலையில், அந்த போனின் டீசர் ஒன்றை ட்விட்டரில் வெளியிட்டிருக்கிறது கூகுள். ஆப்பிள் மற்றும் சாம்சங்கிற்கு இணையாக ப்ரீமியமான ஸ்மார்ட்போன் பிராண்டாக சந்தையில் தங்களை நிலைநிறுத்திக் கொண்டிருக்கிறது கூகுள். அந்த நிறுவனத்தில் இருந்து ஒரு ஃபோல்டபிள் போன் என்றவுடன் பிக்ஸல் ரசிகர்கள் குஷியாகி மிகந்த எதிர்பார்ப்போடு காத்துக் கொண்டிருக்கிறார்கள். இந்த நிலையில் தான் தங்களது முதல் ஃபோல்டபிள் போனின் டீசரை வெளியிட்டிருக்கிறது கூகுள் நிறுவனம்.
என்னென்ன அறிவிப்புகள் வெளியாகும்?
கூகுளின் வருடாந்திர I/O நிகழ்வு வரும் மே 10-ம் தேதி நடைபெறவிருக்கிறது. அந்த நிகழ்விலேயே இந்த புதிய ஃபோல்டபிள் போனை வெளியிடவிருக்கிறது கூகுள். இந்த போன் மட்டுமல்லாது, பிக்ஸல் 6a-வின் அப்டேட்டட் வெர்ஷனான பிக்ஸல் 7a மற்றும் பிக்ஸல் டேப்லட் ஆகிய சாதனங்களையும் கூகுள் வெளியிடும் என எதிர்பார்க்கப்படுகிறது. தற்போது கிடைத்திருக்கும் தகவல்களின்படி, பிக்ஸல் 7 மற்றும் 7 ப்ரோவில் பயன்படுத்தப்பட்டிருக்கும் டென்சார் G2 ப்ராசஸரையே பிக்ஸல் ஃபோல்டு மொபைலிலும் கூகுள் பயன்படுத்தியிருக்கும் என எதிர்பார்க்கப்படுகிறது. 120Hz ரெப்ரெஷ் ரேட் கொண்ட 5.8 இன்ச் வெளிப்புற டிஸ்பிளேவையும், 120Hz ரெப்ரெஷ் ரேட் கொண்ட 7.6 இன்ச் உட்புற டிஸ்பிளேவையும் கூகுள் இதில் பயன்படுத்தியிருக்கலாம் என எதிர்பார்க்கப்படுகிறது.
