புதிய மேம்படுத்தப்பட்ட பிக்சல் வாட்ச் 2-வை உருவாக்கி வரும் கூகுள்.. இந்தியாவிலும் வெளியிடப்படுமா?
செய்தி முன்னோட்டம்
கடந்தாண்டு புதிய 'பிக்சல் வாட்ச்' மூலம் ஸ்மார்ட்வாட்ச் சந்தையில் அடியெடுத்து வைத்து கூகுள். மேம்படுத்தப்பட்ட சிப்பைப் பயன்படுத்தாமல், பழைய சிப்பைப் பயன்படுத்தியதன் காரணமாக, பின்னடைவுகளைச் சந்தித்து பயனர்களிடையே டிஸ்லைக்குகளைப் பெற்றது பிக்சல் வாட்ச்.
தற்போது கூகுள் ரசிகர்களுக்கான நற்செய்தியாக, புதிய ஸ்மார்ட்வாட்ச் ஒன்றை விரைவில் அந்நிறுவனம் வெளியிடவிருப்பதாக தகவல் வெளியாகியிருக்கிறது.
முந்தைய வாட்ச்சில் பயனர்கள் எதிர்கொண்ட பிரச்சினைகளை சரிசெய்த, மேம்படுத்தப்பட்ட புதிய பிக்சல் வாட்ச் 2-வை உருவாக்கி வருகிறது கூகுள்.
இதுவரை வெளியான ஸ்மார்ட்வாட்ச்களில் வழங்கப்படாத, பயனர்களே எதிர்பார்க்காத வகையில் பல்வேறு புதிய அம்சங்களைக் கொண்டு வெளியாகவிருக்கிறது இந்த புதிய பிக்சல் வாட்ச் 2. முதல் ஸ்மார்ட்வாட்சை கூகுள் இந்தியாவில் வெளியிடாத நிலையில், புதிய வாட்சை இந்தியாவிலும் அந்நிறுவனம் வெளியிடும் என எதிர்பார்க்கப்படுகிறது.
கூகுள்
கூகுள் பிக்சல் வாட்ச் 2: என்னென்ன அம்சங்களைக் கொண்டு வெளியாகவிருக்கிறது
புதிய ஸ்மார்ட்வாட்சில் குவால்காம் ஸ்னாப்டிகாரன் W5 ஜென் 1 ப்ராசஸரைப் பயன்படுத்தவிருக்கிறது கூகுள். இது 2018 எக்ஸினோஸ் 9100 சிப்பை விட மேம்பட்ட ஒரு சிப்செட்டாகப் பார்க்கப்படுகிறது.
புதிய வாட்ச்சில் அல்ட்ரா-வைடு பேண்டையும் (UWB) பயன்படுத்தவிருக்கிறது கூகுள். இதன் மூலம் டிவைஸ் ட்ராக்கிங் மற்றும் பைண்டு மை டிவைஸ் உள்ளிட்ட வசதிகளை மிகவும் எளிதாகவும் துல்லியமாகவும் பயன்படுத்த முடியும்.
மேலும், புதிய ஸ்மார்ட்வாட்ச்சை டிஜிட்டல் கார் சாவியாகவும் பயன்படுத்தும் வசதியை அந்நிறுவனம் அளிக்கவிருப்பதாகத் தகவல் வெளியாகியிருக்கிறது. இதனை பிற கார் தயாரிப்பு நிறுவனங்களுடைய இணைந்து கூகுள் பயன்பாட்டிற்குக் கொண்டு வரலாம்.
வை-ஃபை மற்றும் செல்லுலார் வசதிகளைக் கொண்ட வேரியன்ட்களையும் விதவிதமான குறியீட்டுப் பெயர்களுடன் கூகுள் உருவாக்கி வருவது குறிப்பிடத்தக்கது.