பிங் தேடுபொறியுடன் இணைய வசதியைப் பெறும் சாட்ஜிபிடி
செய்தி முன்னோட்டம்
கடந்தாண்டு நவம்பரில் செயற்கை நுண்ணறிவுத் தொழில்நுட்பத்துடன் கூடிய சாட்ஜிபிடி சாட்பாட்டை வெளியிட்டது ஓபன்ஏஐ. அப்போது சாட்ஜிபிடிக்கு போட்டியாக வேறு எந்த சாட்பாட்டும் சந்தையில் இல்லை.
ஆனால், தற்போது சாட்ஜிபிடி-யை விட அதிக வசதிகளுடன் கூகுளின் பார்டு சாட்பாட் களத்திலிருக்கிறது.
செப்டம்பர் 2021 வரையிலான தகவல் தளத்தை மட்டுமே கொண்டு சாட்ஜிபிடி செயல்பட்டு வரும் நிலையில், நிகழ் நேரத் தகவல்களை இணையதளத்தில் தேடி எடுக்கும் ஆற்றலைக் கொண்டிருக்கிறது கூகுளின் பார்டு.
எனவே, தற்போது பார்டுடன் போட்டியிடும் வகையில் பிங் தேடுபொறியின் உதவியுடன் இணையதளத்தை அணுகும் வசதியை சாட்ஜிபிடிக்கு கொடுத்திருக்கிறது ஓபன்ஏஐ.
கடந்த மாதம் வெளியிட்ட சாட்ஜிபிடியின் ஐஓஎஸ் செயலியில் இந்தக் கூடுதல் வசதியைக் கொடுத்திருக்கிறது ஓபன்ஏஐ நிறுவனம்.
சாட்ஜிபிடி
மைக்ரோசாப்ட்-ஓபன்ஏஐ ஒப்பந்தம்:
ஓபன்ஏஐ நிறுவனத்தின் மீது மைக்ரோசாப்ட் நிறுவனமானது பலபில்லியன் டாலர்களை முதலீடு செய்திருக்கிறது. எனவே, சாட்ஜிபிடியில் முதன்மையான மற்றும் ஒரே தேடுபொறியாக பிங் மட்டுமே பயன்படுத்தப்படும் என அறிவிக்கப்பட்டிருக்கிறது.
இந்த புதிய வசதியுடன், புத்துணர்ச்சியைப் பெற்றிருக்கிறது சாட்ஜிபிடி. இனி, சமீபத்தில் தகவல்கள் அல்லது நிகழ்வுகள் குறித்த கேள்விகளுக்கும் நிகழ் நேரத் தகவல்களைப் பெற்று சாட்ஜிபிடியால் பதிலளிக்க முடியும்.
ஆனால், இந்த வசதியை சாட்ஜிபிடியின பிளஸ் சேவைக்கு சந்தா செய்திருப்பவர்களுக்கு மட்டுமே வெளியிட்டிருக்கிறது ஓபன்ஏஐ. இலவச சாட்ஜிபிடி பயனர்களால் இந்த வசதியைப் பயன்படுத்த முடியாது.
சாட்ஜிபிடியின் பிளஸ் சேவைக்கு சந்தா செய்தவர்கள், அதன் செட்டிங்ஸ் பகுதியில் புதிய அம்சங்களின் கீழ் இடம்பெற்றிருக்கும் இந்த வசதியைப் பயன்படுத்திக் கொள்ள முடியும்.