தொலைக்காட்சி நிறுவனங்களில் ஆட்குறைப்பு பாய்கிறது; 1,500 வேலைகள் ஆபத்தில்; பின்னணி என்ன?
செய்தி முன்னோட்டம்
இந்திய தொலைக்காட்சி தரவரிசை அமைப்பான பார்க் (BARC) தனது சேவைகளை முழுமையாக நிறுத்தும் நிலை உருவானால், அதை சார்ந்து இயங்கும் சுமார் 1,500 ஊழியர்கள் தங்களது வேலைகளை இழக்கும் அபாயத்திற்கு தள்ளப்பட்டுள்ளனர். மத்திய தகவல் மற்றும் ஒளிபரப்பு அமைச்சகத்தின் புதிய தொலைக்காட்சி தரவரிசை கொள்கை 2026-ன் விதிகளுக்கு பார்க் அமைப்பு இன்னும் முழுமையாக இணங்காததால் டிஆர்பி தரவுகள் வழங்குவது இடைநிறுத்தம் செய்யப்பட்டுள்ளது. இதனால் பார்க் அமைப்பின் வருவாய் மாடல் கடுமையாக பாதிக்கப்பட்டு அதன் எதிர்காலமே கேள்விக்குறியாகியுள்ளது.
நிதி இழப்பு
டிஆர்பி தரவுகள் இல்லாததால் தொலைக்காட்சி நிறுவனங்களுக்கு பெரும் நிதி இழப்பு
தொலைக்காட்சி தரவரிசை விவரங்கள் கிடைக்காததால் சேனல்களின் பார்வையாளர்கள் எண்ணிக்கை மற்றும் பிரபலத் தன்மையை நிரூபிக்க முடியாமல் தொலைக்காட்சி நிறுவனங்கள் தவித்து வருகின்றன.
இதன் காரணமாக விளம்பர நிறுவனங்களிடம் கட்டணங்களை நிர்ணயிப்பதிலும், புதிய விளம்பரங்களை பெறுவதிலும் பெரும் சிக்கல் நீடிக்கிறது.
தொடர்ந்து நிலவும் இந்த நிதி நெருக்கடியால் முன்னணி தொலைக்காட்சி நெட்வொர்க்குகள் தங்களது தலையங்கம், ஒளிபரப்பு, சந்தைப்படுத்தல் மற்றும் விற்பனை பிரிவுகளில் தீபாவளி பண்டிகைக்குப் பிறகு கணிசமான ஆட்குறைப்பு நடவடிக்கைகளை மேற்கொள்ளத் திட்டமிட்டு வருகின்றன.
சந்தா கட்டணத்திற்கு தடை
சந்தா கட்டணத் தடை மற்றும் பார்க் அமைப்பின் நிதி நெருக்கடிகள்
டிஆர்பி தகவல்கள் இடைநிறுத்தப்பட்ட காலத்தில் செய்தி சேனல்களிடமிருந்து சந்தா கட்டணம் வசூலிக்கக் கூடாது என மத்திய அரசு ஜூன் மாதம் உத்தரவிட்டது பார்க் அமைப்பிற்கு பேரிடியாக அமைந்தது.
தரவுகள் வழங்கப்படாத போது சந்தா கட்டணம் செலுத்த தேவையில்லை என அமைச்சகம் கூறிய நிலையில், மீட்டர் பொருத்திய வீடுகளைப் பராமரிக்கவும், தகவல்களை சேகரிக்கவும் தொடர் செலவுகள் ஆவதாகக் கூறி இத் தடையை விலக்குமாறு பார்க் கோரியுள்ளது.
இருப்பினும் அரசுத் தரப்பில் இருந்து இன்னும் சாதகமான முடிவுகள் எவையும் அறிவிக்கப்படாமல் இழுபறி நீடிக்கிறது.
நவம்பர் காலக்கெடு
அமைச்சகத்தின் நவம்பர் காலக்கெடு மற்றும் ஊடக அமைப்புகளின் முடிவு
தகவல் ஒலிபரப்புத் துறை அமைச்சர் அஸ்வினி வைஷ்ணவ், பார்க் தனது மீட்டரிங் கட்டமைப்பை 80,000 வீடுகளாக உயர்த்த நவம்பர் மாதம் வரை அவகாசம் அளித்துள்ளார்.
தற்போது 70,876 வீடுகளில் மீட்டர்கள் பொருத்தப்பட்டுள்ளதாகவும் டிசம்பருக்குள் இலக்கு எட்டப்படும் என்றும் பார்க் தெரிவித்துள்ளது.
இதற்கிடையே, இந்திய பாட்காஸ்டிங் மற்றும் டிஜிட்டல் ஃபவுண்டேஷன் (IBDF) உறுப்பினர்கள் அவசர ஆலோசனை நடத்தி, இந்த முட்டுக்கட்டை நீடித்தால் பார்க் அமைப்பை முற்றிலும் மூடுவது குறித்து இறுதி முடிவு எடுக்க மத்திய அரசை அணுகத் திட்டமிட்டுள்ளனர்.