சனி கோளைச் சுற்றி வரும் 62 புதிய நிலவுகளை கண்டறிந்துள்ளனர் விஞ்ஞானிகள்!
கடந்த சில மாதங்களுக்கு முன்பு தான் விண்வெளியில் அதிக நிலவுகளைக் கொண்ட கோள் என்ற பெயரை சனியிடம் இருந்து தட்டிப்பறித்தது வியாழன். தற்போது சனி கோளைச் சுற்றி மேலும் புதிய நிலவகள் கண்டறியப்பட, சூரிய குடும்பத்திலேயே அதிக நிலவுகள் கொண்ட கோள் என்ற பெயரை மீண்டும் பெற்றிருக்கிறது சனி. சனி கோளைச் சுற்றி 62 புதிய நிலவுகளைக் கண்டறிந்திருக்கின்றனர் விஞ்ஞானிகள். இந்த கண்டுபிடிப்புகளைத் தொடர்ந்து 145 நிலவுகளுடன், அதிக நிலவுகளைக் கொண்ட கோளாகியிருக்கிறது சனி. முன்னர் 92 நிலவுகளுடன் அதிக நிலவுகளைக் கொண்ட கோளாக வலம்வந்து கொண்டிருந்தது வியாழன். புதிய நிலவுகளைக் கண்டறிய நெப்ட்யூன் மற்றும் யுரேனஸ் கோள்களின் நிலவுகளைக் கண்டறியப் பயன்படுத்திய, 'ஷிப்ட் அண்டு ஸ்டேக்' முறையைப் பயன்படுத்தியதாகத் தெரிவித்திருக்கின்றனர் விஞ்ஞானிகள்.
புதிய நிலவுகள் கண்டுபிடிப்பு!
இந்த புதிய நிலவுகளைக் கண்டறிவதற்கான முயற்சி 2019-ம் ஆண்டு தொடங்கியிருக்கிறது. பல வருடங்கள் சனி கோளைக் கண்காணித்து, அதனைச் சுற்றி வருபவை நிலவுகள் தான் விண்கற்கல் அல்ல என்பதை விஞ்ஞானிகள் உறுதி செய்திருக்கின்றனர். தற்போது கண்டறியப்பட்டுள்ள நிலவுகளில் பெரும்பாலான நிலவுகள் சீரற்ற நிலவுகளாக இருப்பதாகத் தெரிவித்திருக்கின்றனர். சாதாரண நிலவுகள் குறைவான சாய்மானத்தைக் கொண்ட, குறுகிய நீள்வட்டப்பாதையில் கோள்களைச் சுற்றி வரும். சீரற்ற நிலவுகள் என்பபடுவை, அதிக சாய்மானத்தைக் கொண்ட பெரிய நீள்வட்டப்பாதையில் கோள்களைச் சுற்றி வருபவை. சனியின் நிலவுகளில் 121 நிலவுகள் சீரற்ற தன்மையைக் கொண்டவையாகவே இருப்பதாகக் குறிப்பிட்டிருக்கின்றனர். அதிக நிலவுகளைக் கொண்ட கோளாக மட்டுமல்லாமல், சூரிய குடும்பத்திலேயே 100-க்கும் மேற்பட்ட நிலவுகளைக் கொண்ட ஒரே கோளாகவும் இதன் மூலம் அறியப்படவிருக்கிறது சனி.
