2026இல் இந்தியாவின் முதல் செயற்கைகோள்: பிஎஸ்எல்வி-சி62 கவுண்டவுன் தொடக்கம்
செய்தி முன்னோட்டம்
இந்திய விண்வெளி ஆராய்ச்சி நிறுவனம் (இஸ்ரோ), 2026 ஆம் ஆண்டின் தனது முதல் விண்வெளிப் பயணத்தைத் தொடங்கத் தயாராகிவிட்டது. ஸ்ரீஹரிகோட்டாவில் உள்ள சதீஷ் தவான் விண்வெளி மையத்திலிருந்து திங்கட்கிழமை (ஜனவரி 12) காலை 10:18 மணிக்கு பிஎஸ்எல்வி-சி62 விண்கலம் விண்ணில் ஏவப்பட உள்ளது. இதற்கான 22.5 மணி நேர கவுண்டவுன் ஞாயிற்றுக்கிழமை மதியம் 12:48 மணிக்குத் தொடங்கியது. இது பிஎஸ்எல்வி ராக்கெட்டின் 64-வது பயணமாகும். இந்த விண்கலத்தின் மிக முக்கியமான சுமை, பாதுகாப்பு ஆராய்ச்சி மற்றும் மேம்பாட்டு அமைப்பால் (டிஆர்டிஓ) உருவாக்கப்பட்ட EOS-N1 (அன்வேஷா) என்ற புவி கண்காணிப்பு செயற்கைக்கோள் ஆகும்.
சைபர் கஃபே
விண்வெளியில் முதல் சைபர் கஃபே
சுமார் 400 கிலோ எடை கொண்ட அன்வேஷா செயற்கைக்கோள், ஹைப்பர்ஸ்பெக்ட்ரல் (Hyperspectral) இமேஜிங் தொழில்நுட்பத்தைக் கொண்டது. இதன் மூலம் எல்லைப் பகுதிகளைக் கண்காணித்தல், பேரிடர் மேலாண்மை மற்றும் விவசாய நிலங்களை மிகத் துல்லியமாக ஆய்வு செய்ய முடியும். பிஎஸ்எல்வி-சி62 விண்கலத்தில் அன்வேஷாவுடன் சேர்த்து மொத்தம் 15 சிறிய ரக செயற்கைக்கோள்களும் விண்ணில் ஏவப்படுகின்றன. இதில் ஹைதராபாத்தைச் சேர்ந்த ஸ்டார்ட்அப் நிறுவனமான 'TakeMe2Space' உருவாக்கியுள்ள MOI-1 செயற்கைக்கோள் அனைவரின் கவனத்தையும் ஈர்த்துள்ளது. இது விண்வெளியில் உலகின் முதல் சைபர் கஃபே (Cybercafe in space) அமைப்பதை நோக்கமாகக் கொண்டுள்ளது. மேலும், இதில் உலகின் மிக எடை குறைந்த விண்வெளித் தொலைநோக்கியான மீரா (MIRA) பொருத்தப்பட்டுள்ளது.
மறுபிரவேசம்
மறுபிரவேசம் செய்யும் புதிய தொழில்நுட்பம்
இந்தத் திட்டத்தின் மற்றொரு சிறப்பம்சம் என்னவென்றால், விண்கலத்தின் நான்காவது அடுக்கு (PS4) மூலம் மீண்டும் பூமிக்குள் நுழையும் (Re-entry) தொழில்நுட்பம் சோதிக்கப்பட உள்ளது. ஸ்பெயின் நாட்டைச் சேர்ந்த ஒரு ஸ்டார்ட்அப் நிறுவனம் உருவாக்கியுள்ள 25 கிலோ எடை கொண்ட கெஸ்ட்ரல் (Kestrel) என்ற கேப்சூல், விண்வெளியிலிருந்து பிரிந்து மீண்டும் வளிமண்டலத்திற்குள் நுழைந்து தெற்கு பசிபிக் கடலில் விழும் வகையில் வடிவமைக்கப்பட்டுள்ளது. இது எதிர்காலத்தில் விண்கலங்களை மீண்டும் பயன்படுத்தும் தொழில்நுட்பத்திற்கு (Reusable technology) ஒரு முன்னோடியாக அமையும்.