ஆடி முதல் நாளில் ஏன் தேங்காய் சுடுகிறார்கள்? கொங்கு மண்ணின் பாரம்பரிய தேங்காய் சுடும் நோம்பிக்கு இப்படியொரு பின்னணியா!
செய்தி முன்னோட்டம்
தமிழ் மாதங்களில் ஆடி மாதம் பிறந்துவிட்டாலே அம்மன் கோயில் வழிபாடுகளும், ஆடிப்பெருக்குக் கொண்டாட்டங்களும் தான் தமிழகம் முழுவதும் நினைவுக்கு வரும். ஆனால் சேலம், நாமக்கல், ஈரோடு, தருமபுரி, கரூர் உள்ளிட்ட கொங்கு மண்டல கிராமங்களில் ஆடி முதல் நாளை வரவேற்க ஒரு தனித்துவமான மரபு கடைப்பிடிக்கப்பட்டு வருகிறது. அதுதான் 'தேங்காய் சுடும் நோன்பு'. மாலை சூரியன் மறையும் வேளையில், வீட்டின் வாசலில் சிறு நெருப்பு மூட்டி, குச்சியில் குத்தப்பட்ட தேங்காய்களை சுட்டு எடுக்கும் இந்த வழக்கம் கொங்கு மண்ணின் மிக முக்கியப் பண்பாட்டு அடையாளமாகும்.
பின்னணி
மகாபாரதப் போரும் தேங்காய் சுடுதலின் பின்னணியும்
மேலோட்டமாக பார்க்கும்போது இது ஒரு சமையல் முறை போலத் தோன்றினாலும், இதற்குப் பின்னால் ஒரு ஆழமான ஆன்மீகக் காரணியும், மகாபாரத வரலாறும் ஒளிந்துள்ளது.
கொங்கு நாட்டுப்புற நம்பிக்கையின்படி, மகாபாரதப் போரானது ஆடி மாதம் முதல் நாளன்று தொடங்கி, 18 நாட்கள் நடைபெற்று ஆடி 18 ஆம் நாள் முடிவுக்கு வந்ததாகக் நம்பப்படுகிறது.
அதன்படி, இந்தப் போரில் தர்மம் வெல்ல வேண்டும் என்பதற்காக, தர்மத்தின் பக்கமிருந்த பாண்டவர்கள் வெல்ல வேண்டும் என்ற எண்ணத்தில், போரை எழுதத் தொடங்கிய விநாயகப் பெருமானுக்கு மக்கள் இந்தத் தேங்காயை சுட்டுப் படைக்கும் மரபு உருவானது.
சுவாரஸ்ய சடங்கு
இனிப்புப் பூரணம் நிரப்பும் சுவாரஸ்யமான சடங்கு
பொதுவாகக் கோயில்களில் தேங்காயை உடைத்து வழிபடும் முறைக்கு மாற்றாக, இந்த நோன்பில் தேங்காய் உடைக்கப்படுவதில்லை.
தேங்காயின் ஒரு கண்ணைத் துளைத்து, உள்ளே இருக்கும் நீரை வெளியேற்றிவிட்டு, அதற்குள் பச்சரிசி, வெல்லம், பொட்டுக்கடலை, எள், பாசிப்பருப்பு, அவல் மற்றும் ஏலக்காய் ஆகியவற்றை ஒன்றாகக் கலந்து பூரணமாக நிரப்புகிறார்கள்.
நெருப்பின் சூட்டில் உள்ளே இருக்கும் வெல்லம் உருகி, தேங்காயின் உள்ளேயே சுவை மிகுந்த பிரசாதமாக மாறிவிடும்.
சில குடும்ப வழக்கப்படி இதில் முந்திரி, திராட்சை மற்றும் தேங்காய் துருவலும் சேர்க்கப்படுகிறது.
மரக்குச்சி
அழிஞ்சில் மரக்குச்சியின் ஆன்மீக மற்றும் மருத்துவ ரகசியம்
இந்தத் தேங்காய் சுடும் சடங்கில் அழிஞ்சில் மரக்குச்சிகளுக்கே முதலிடம் வழங்கப்படுகிறது.
தொழில்நுட்ப ரீதியாக இந்த மரக்குச்சிகளில் ஈரப்பதம் அதிகம் இருப்பதால், அவை நெருப்பில் உடனே தீப்பிடிக்காமல் நீண்ட நேரம் தேங்காயை சுடுவதற்கு வசதியாக இருக்கும்.
அதேநேரம், சித்த மருத்துவ மரபில் அழிஞ்சில் மரத்திற்குத் தனித்துவமான மருத்துவ குணங்கள் உண்டு.
அதனை தேங்காயோடு சேர்த்து சுட்டு உண்ணும்போது, உடலுக்கு நலம் சேர்க்கும் என்பது பெரியவர்களின் ஆழமான நம்பிக்கையாக உள்ளது.
பாரம்பரியம்
உறவுகளை இணைக்கும் வாழும் பாரம்பரியம்
ஒரு காலத்தில் இது கிராம மக்களை ஒன்றிணைக்கும் மிக முக்கிய சமூக நிகழ்வாக இருந்தது.
உறவினர்கள் அனைவரும் ஒரே இடத்தில் கூடி நெருப்பு மூட்டித் தேங்காய் சுடுவதன் மூலம், இது மனிதர்களிடையே இருக்கும் சலிப்பை நீக்கி, இணக்கமான சமூக உறவை ஏற்படுத்துகிறது.
தொழில்நுட்ப வளர்ச்சியால் மனிதர்கள் தங்களுக்குள் சுருங்கி வரும் இந்த நவீனக் காலத்தில், இத்தகைய பாரம்பரியப் பண்டிகைகள் மனிதர்களை நேரில் சந்திக்க வைத்து, அன்பைப் பகிர்ந்து கொள்ள உதவுகின்றன.
மண்ணோடு கலந்த இந்த வாழ்க்கை முறையை அடுத்த தலைமுறைக்குக் கொண்டு சேர்ப்பது நம் ஒவ்வொருவரின் கடமையாகும்.