LOL மற்றும் ROFL சுருக்கங்களைப் பயன்படுத்தியிருப்பீர்கள், IJBOL பற்றித் தெரியுமா?
செய்தி முன்னோட்டம்
சமூக வலைத்தளங்களை அதிகம் பயன்படுத்துபவர்கள், LOL, ROFL மற்றும் LMAO உள்ளிட்ட சுருக்கங்களைப் பயன்படுத்தியிருப்போம். நம்மில் சிலர் இந்த சுருக்கம் எதற்காக என்று கூடத் தெரியாமல் பயன்படுத்தத் தொடங்கி, பின்னர் அதன் விரிவாக்கத்தை அறிந்திருப்போம். மேற்கூறிய சுருக்கங்கள் எல்லாம், கேலியான அல்லது நகைச்சுவையான நிகழ்வுகள் அல்லது விஷயங்களுக்கு நாம் பயன்படுத்தும் வார்த்தைகள் தான். ஒரு நிகழ்வின் நகைச்சுவை அளவைப் பொருத்து மேற்கூறிய வார்த்தைகள் பயன்பாடும் மாறுபடும். இந்த வார்த்தைகளைக் கடந்து, கடந்த சில ஆண்டுகளாகப் புதிய வார்த்தைச் சுருக்கம் ஒன்றை ஜென் Z தலைமுறையினர் பயன்படுத்தி வருகிறார்கள். IJBOL என்ற வார்த்தையே, சமூக வலைத்தள பயன்பாட்டு அகராதியில் புதிதாக இணைந்திருக்கிறது.
IJBOL
IJBOL என்றால் என்ன?
'ஈஜ் போல்' என்ற உச்சரிப்பு கொண்ட மேற்கூறிய வார்த்தைக்கு 'I Just Burst Out Laughing', எனப் பொருளாம். 2009 முதலே இந்த வார்த்தை ஆங்கில அகராதியில் இடம்பெற்று வந்தாலும், கடந்த 2021 முதலே இந்த வார்த்தை அதிகமாக உபயோகப்படுத்தப்பட்டு வருகிறது. தேவையில்லாத இடங்களில் சிரிப்பவர்களை அல்லது சிரிப்பதைக் குறிக்க இந்த வார்த்தையைப் பயன்படுத்துகின்றனர். முக்கியமாகப் பிரபலங்கள். அமெரிக்க நெட்டிசன்கள், IJBOL என்ற வார்த்தைக்கு உருவகமாக, அந்நாட்டு துணை அதிபர் கமலா ஹாரிசைக் குறிக்கின்றனர். பொது இடங்கள் மற்றும் பேட்டிகளில் கமலா ஹாரிஸ் சிரிக்கும் சிறிய காணொளிகள் டிக்டாக்கிலும், சமூக வலைத்தளங்களிலும் அதிகம் பகிரப்படவே, கமலா ஹாரிசை அந்த வார்த்தையின் உருவகம் எனக் கூறி வருகின்றனர் அமெரிக்க நெட்டிசன்கள்.