மென்ஸ்சுரல் கப் என்றால் என்ன? அதைப் பற்றி நீங்கள் தெரிந்து கொள்ள வேண்டிய சில தகவல்கள்
தற்போது இருக்கும் இளம் தலைமுறையினர், அடிக்கடி இந்த Menstrual Cup என்ற சொல்லை பயன்படுத்தி கேட்டிருப்பீர்கள். அதை பற்றி அதிகம் தெரியாதவர்களுக்கான செய்தி தான் இது. மென்ஸ்சுரல் கப் (Menstrual Cup) என்பது ஒரு மாதவிடாய் சுகாதார சாதனம் ஆகும். இது மாதவிடாய் காலத்தில், பெண்கள் உபயோகிக்கும், சானிடரி பேடுக்கு மாற்று தான் இது. ஆனால், இந்த கப், மாதவிடாய் காலத்தில், யோனிக்குள் (Vagina) செருகப்படுகிறது. கருப்பையிலிருந்து வெளியேறும், மாதவிடாய் திரவத்தை இந்த கப் சேகரிக்கும். இது சுற்றுசுழலுக்கும், உடலுக்கும் பாதுகாப்பானதாக கருதப்படுகிறது. மென்ஸ்சுரல் கப்கள், பொதுவாக நெகிழ்வான மருத்துவ தர சிலிகான், லேடெக்ஸ் அல்லது தெர்மோபிளாஸ்டிக் ஐசோமரால் தயாரிக்கப்படுகின்றன.
மென்ஸ்சுரல் கப்கள் மேலும் சில தகவல்கள்
இந்த கப், ஒரு கோப்பையுடன், தண்டு இணைக்கப்பட்ட வடிவத்தில் வருகிறது. அந்த தண்டு, கப்பை இலகுவாக, உள்சொருகுவதற்கும் அகற்றுவதற்கும் பயன்படுத்தப்படுகிறது. கோப்பை வடிவத்தில் இருக்கும் மேல்பகுதியானது, யோனி சுவரில் பொருந்திக்கொள்ளும். யோனியில் சரியாக இன்சர்ட் செய்த பிறகு, அந்த கோப்பையில் மாதவிடாய் திரவம் சேகரிக்கப்படும். சானிடரி பேட்கள், டம்பான்களுக்கு மாற்றாக கருதப்படுகிறது. பேட்களில் பயன்படுத்தப்படும் செயற்கை ரசாயனங்களும், அதனால் ஏற்படும் பாக்டீரியல் தொற்றுகளும் இதன் மூலம் தவிர்க்கப்படும். மென்சுரல் கப்புகளில், அந்த பிரச்சனை இல்லை என மருத்துவர்களும் பரிந்துரைக்கிறார்கள். மேலும், கப்புகளை பராமரிப்பதும் எளிது. ஒரு கப்பை, 10 ஆண்டுகள் வரை உபயோகிக்கலாம் என கூறப்படுகிறது. மேலும், இதில் பயன்படுத்தப்படும் மூல பொருட்கள், மறுசுழற்சிக்கு ஏற்றது எனவும் அறியப்படுகிறது.
