கடையில வாங்குன புது டிரஸ்ஸ அப்படியே போடுறீங்களா? உடனே நிறுத்துங்க! துணிகளில் இருக்கும் ஃபார்மால்டிஹைட் கெமிக்கல் செய்யும் பயங்கரம்
செய்தி முன்னோட்டம்
தீபாவளி, பொங்கல் போன்ற பண்டிகை காலங்களிலோ அல்லது வார இறுதி நாட்களிலோ நாம் வாங்கும் புதிய ஆடைகளை, வாங்கிய உடனே உடுத்திப் பார்ப்பதில் ஒரு தனி மகிழ்ச்சி இருக்கத்தான் செய்கிறது. பலரும் புதிய ஆடைகளில் இருக்கும் அந்தத் தனித்துவமான மணம் மற்றும் மொடமொடப்புத் தன்மை பிடித்துப் போய், அதைத் துவைக்காமல் அப்படியே அணிந்து கொள்கிறார்கள். ஆனால், இவ்வாறு செய்வது பார்ப்பதற்கு அழகாகத் தெரிந்தாலும், நமது ஆரோக்கியத்திற்கு, குறிப்பாக நமது சருமத்திற்கு தீங்கினை விளைவிக்கும் என்பது பலரும் அறியாத கசப்பான உண்மையாகும்.
ஃபார்மால்டிஹைட்
ஆடைகளில் சுருக்கம் தவிர்க்கப் பயன்படும் 'ஃபார்மால்டிஹைட்'
ஆடை உற்பத்தித் தொழிற்சாலைகளில் துணிகள் நெய்யப்பட்டு, அவை கடைகளுக்கு அனுப்பப்படும் வரை நீண்ட நாட்கள் சுருக்கங்கள் விழாமல் இருக்கவும், பூஞ்சை காளான் மற்றும் பூச்சிகளால் பாழாகாமல் இருக்கவும் ஃபார்மால்டிஹைட் என்ற ரசாயனம் துணிகளின் மீது பரவலாகப் பயன்படுத்தப்படுகிறது.
இந்த ரசாயனமே புதிய ஆடைகளுக்கு அந்த மொடமொடப்பான தோற்றத்தையும், ஒருவித ரசாயன மணத்தையும் தருகிறது.
இந்த ஆடையைத் துவைக்காமல் அப்படியே உடம்பில் அணியும்போது, அந்த நச்சு இரசாயனம் நமது வியர்வையோடு கலந்து நேரடியாக சருமத்திற்குள் ஊடுருவத் தொடங்குகிறது.
அலர்ஜி
சருமத்தை மெல்லப் பதம் பார்க்கும் ஆபத்தான அலர்ஜிகள்
ஃபார்மால்டிஹைட் ரசாயனம் கலந்த ஆடைகளைத் துவைக்காமல் நீண்ட நேரம் அணியும்போது, அது காண்டாக்ட் டெர்மடைடிஸ் எனப்படும் கடுமையான தோல் அலர்ஜியை ஏற்படுத்துகிறது.
இதனால் சருமத்தில் கடுமையான அரிப்பு, சிவப்புத் தடிப்புகள், வீக்கம் மற்றும் சிலருக்குத் தோல் உதிர்வு போன்ற பாதிப்புகள் ஏற்படுகின்றன.
குறிப்பாக அக்குள்கள், கழுத்துப் பகுதி மற்றும் தொடை இடுக்குகள் போன்ற அதிக வியர்வை சுரக்கும் இடங்களில் இந்த பாதிப்புகள் மிகத் தீவிரமாக வெளிப்படும்.
கிருமி தொற்று
பல கைகள் மாறும் ஆடைகளும் கிருமித் தொற்றுகளும்
ஒரு புதிய ஆடை நெய்யப்பட்டு, அது இறுதி வடிவம் பெற்று நுகர்வுக்கு வரும் வரை நூற்றுக்கணக்கான தொழிலாளர்களின் கைகள், தூசுகள் நிறைந்த கிடங்குகள் மற்றும் போக்குவரத்து வாகனங்களைக் கடந்துதான் ஜவுளிக் கடைகளை வந்தடைகிறது.
கடைகளுக்கு வந்த பிறகும் கூட, அந்த ஆடையைப் பல வாடிக்கையாளர்கள் தங்களது உடலுக்குப் பொருந்துகிறதா என்று அணிந்து பார்த்து மாற்றியிருப்பார்கள்.
இதனால் முந்தைய நபர்களின் உடலில் இருந்த பாக்டீரியாக்கள், பூஞ்சை தொற்றுகள் மற்றும் வியர்வை எச்சங்கள் அந்த ஆடையில் தங்கியிருக்க பெரும் வாய்ப்புள்ளது.
கூடுதல் கவனம்
குழந்தைகளுக்கான ஆடைகளில் கூடுதல் கவனம் தேவை
பெரியவர்களை விடக் குழந்தைகளின் சருமம் மிகவும் மென்மையானது மற்றும் உணர்திறன் மிக்கது.
எனவே, குழந்தைகளுக்குப் புதிய ஆடைகளை வாங்கித் தரும்போது இன்னும் கூடுதல் எச்சரிக்கையுடன் இருக்க வேண்டும்.
துவைக்காமல் அணிவிக்கப்படும் ஆடைகளில் உள்ள இரசாயனங்கள் குழந்தைகளின் மென்மையான தோலில் மிக வேகமாகக் கடுமையான ஒவ்வாமையையும், சுவாசக் கோளாறுகளையும் கூட ஏற்படுத்தக்கூடும் என்பதால் பெற்றோர்கள் இதில் அலட்சியமாக இருக்கக் கூடாது.
எளிய தீர்வு
அலர்ஜியைத் தவிர்க்கும் எளிய தீர்வு
இந்த ஆரோக்கியக் குறைபாடுகளில் இருந்து தப்பிக்க மிக எளிய வழி, புதிய ஆடைகளை வாங்கியவுடன் லேசான சோப்புத் தூள் அல்லது கிருமிநாசினி திரவத்தைப் பயன்படுத்தி ஒருமுறை நன்றாகத் துவைத்து, வெயிலில் உலர வைத்த பின்னரே உடுத்துவதாகும்.
துவைக்கும்போது ஆடைகளில் உள்ள உபரி ஃபார்மால்டிஹைட் இரசாயனங்கள் மற்றும் ஒட்டியிருக்கும் கிருமிகள் முற்றிலும் நீக்கப்பட்டுவிடும்.
வாங்கிய உடனே உடுத்த வேண்டும் என்ற அவசரத்தை விட, நமது சருமத்தின் ஆரோக்கியமே முக்கியம் என்பதை உணர்ந்து செயல்படுவது நலம் பயக்கும்.