மதியம் தூங்கி எழுந்தால் தலைவலி அல்லது சோர்வாக இருக்கிறதா? நீங்கள் செய்யும் இந்தத் தவறுதான் காரணம்
செய்தி முன்னோட்டம்
மதிய நேரத்தில் சிறிது நேரம் தூங்குவது அன்றைய நாளின் மீதிப் பகுதியை உற்சாகமாகக் கழிக்க உதவும். ஆனால், நீண்ட நேரம் அல்லது தவறான நேரத்தில் தூங்குவது சில பாதிப்புகளை ஏற்படுத்தும் என மருத்துவர்கள் எச்சரிக்கின்றனர். நீங்கள் 30 நிமிடங்களுக்கு மேல் தூங்கும்போது, உங்கள் மூளை ஆழ்ந்த உறக்க நிலைக்கு சென்றுவிடும். அந்த நிலையிலிருந்து திடீரென விழிக்கும்போது Sleep Inertia என்ற நிலை ஏற்படுகிறது. இதனால், தலைச்சுற்றல் அல்லது மந்தமான உணர்வு, சிந்தனைத் திறன் குறைதல், எதிலும் கவனம் செலுத்த முடியாமை, தூங்குவதற்கு முன் இருந்ததை விட அதிக சோர்வு ஆகியவை ஏற்படுகிறது.
சரியான நேரம்
சரியான தூக்க நேரம்
மதிய நேரத்தின் பிற்பகுதியில் அல்லது மாலையில் தூங்குவது உங்கள் உடலின் இயற்கையான உறக்கச் சுழற்சியைப் பாதிக்கும். இதனால் இரவு நேரத்தில் சரியான நேரத்திற்குத் தூக்கம் வராது. இது காலப்போக்கில் தூக்கமின்மைப் பிரச்சினைக்கு வழிவகுக்கும். ஆராய்ச்சிகளின்படி, 15 முதல் 25 நிமிடங்கள் வரையிலான குறுகிய தூக்கமே சிறந்தது. இதை 'பவர் நேப்' (Power Nap) என்று அழைக்கிறார்கள். இது உங்களை ஆழ்ந்த உறக்க நிலைக்குக் கொண்டு செல்லாமல், மூளைக்குத் தேவையான புத்துணர்வை மட்டும் அளிக்கும்.
எச்சரிக்கை
எப்போது எச்சரிக்கையாக இருக்க வேண்டும்?
தினமும் நீண்ட நேரம் மதியத் தூக்கம் தேவைப்படுகிறது என்றால், உங்கள் இரவு நேரத் தூக்கத்தில் ஏதோ குறைபாடு உள்ளது என்று அர்த்தம். மன அழுத்தம், அதிகப்படியான சோர்வு அல்லது தூக்கம் தொடர்பான கோளாறுகள் இதற்குப் பின்னால் இருக்கலாம். சுருக்கமாகச் சொன்னால், மதியத் தூக்கம் என்பது மருந்தைப் போன்றது. சரியான அளவில், சரியான நேரத்தில் (மதிய உணவிற்குப் பின், மாலைக்கு முன்) எடுத்துக்கொண்டால் மட்டுமே அது உங்களுக்குப் பலன் தரும்.