நேரு குடும்பப்பெயரைக் கண்டு ஏன் காந்திகள் பயப்படுகிறார்கள்: பிரதமர் மோடி
மக்களவையில் எதிர்க்கட்சிகளை சரமாரியாக நேற்று சாடியதை அடுத்து, பிரதமர் மோடி இன்று(பிப் 9) மாநிலங்களவையில் ஜனாதிபதியின் உரைக்கு நன்றி தெரிவிக்கும் தீர்மானத்திற்கு பதிலளித்தார். காந்தி(ராகுல் காந்தி) குடும்பத்தை கிண்டல் செய்த பிரதமர், நேரு குடும்பப்பெயருக்கு ஏன் பயப்படுகிறீர்கள் என்று கேள்வி எழுப்பினார். அதில் என்ன அவமானம் இருக்கிறது என்றும் கேட்டார். அதானி பிரச்னையை பேச வலியுறுத்தும் எதிர்க்கட்சிகளின் கோஷங்களோடு பிரதமரின் உரை இன்று ஆரம்பமானது. சமீபத்தில், மோடி மற்றும் அதானி பற்றி ராகுல்காந்தி நாடாளுமன்றத்தில் பேசி இருந்தார். அப்போது, பிரதமர் மோடி ஆட்சிக்கு வந்த பிறகு அதானியின் சொத்து மதிப்பு $8 பில்லியனில் இருந்து $140 பில்லியனாக அதிகரித்துள்ளது என்று கூறிய ராகுல்காந்தி, விதிகளை மீறி அதானிக்கு சாதகமாக மோடி செயல்படுவதாக குற்றம்சாட்டினார்.
பாஜக பணி கலாச்சாரத்தை மாற்றியமைத்தது: பிரதமர்
2014ஆம் ஆண்டு ஆட்சிக்கு வந்த பிறகு, இந்தியாவின் ஒட்டுமொத்த வளர்ச்சிக்கு எதிராக காங்கிரஸ் செயல்பட்டு வருகிறது என்று கூறிய பிரதமர், நாடு எதிர்கொள்ளும் எண்ணற்ற பிரச்சினைகளுக்கு காங்கிரஸ் ஒருபோதும் தீர்வைக் காணவில்லை என்று குற்றம்சாட்டினார். ஆளும் பாஜகவைப் பாராட்டிய அவர், காங்கிரஸ் கட்சியைப் போலல்லாமல், பிரச்சினைகளுக்கு நிரந்தரத் தீர்வு காண்பதில் பாஜக கவனம் செலுத்துவதாகக் கூறினார். ஒரு நாளிதழ் செய்தியை மேற்கோள் காட்டிய மோடி, காங்கிரஸ் ஆட்சியில் 600க்கும் மேற்பட்ட அரசுத் திட்டங்களுக்கு காந்தி-நேரு குடும்பத்தின் பெயர் சூட்டப்பட்டதாக கூறினார். எதிர்க்கட்சிகள் அறிவியலுக்கு எதிரானது என்றும், அவர்களின் முன்னுரிமை அரசியலே தவிர, வளர்ச்சி அல்ல என்றும் கூறிய அவர், தனது அரசாங்கம் தொழில்நுட்பத்தின் சக்தியுடன் இந்தியாவின் பணி கலாச்சாரத்தை மாற்றியமைத்துள்ளதாகவும் கூறியுள்ளார்.
இந்த காலவரிசையைப் பகிரவும்