பள்ளிக் கல்வியில் தமிழகம் தொடர்ந்து முதலிடம்; தொடக்கக் கல்வியில் இடைநிற்றல் விகிதம் பூஜ்ஜியம் என சாதனை
செய்தி முன்னோட்டம்
மத்திய அரசின் கல்விக்கான ஒருங்கிணைந்த மாவட்டத் தகவல் அமைப்பு (UDISE+) வெளியிட்டுள்ள புதிய அறிக்கையின்படி, பள்ளிக் கல்வியின் அனைத்து முக்கியக் குறியீடுகளிலும் தமிழ்நாடு தேசிய சராசரியை விடச் சிறப்பாகச் செயல்பட்டு தொடர்ந்து முன்னணியில் உள்ளது. குறிப்பாக, கடந்த கல்வி ஆண்டில் தொடக்க மற்றும் நடுநிலை பள்ளி வகுப்புகளில் மாணவர்களின் இடைநிற்றல் விகிதம் முற்றிலும் ஒழிக்கப்பட்டு பூஜ்ஜியமாக பதிவாகியுள்ளது. இந்தியாவின் மொத்தப் பள்ளிகளில் 3.9% பள்ளிகள் தமிழ்நாட்டில் அமைந்துள்ள நிலையில், நாட்டின் பள்ளி செல்லும் குழந்தைகளில் 5%க்கு தமிழகம் கல்வி வழங்கி வருகிறது. மாநிலத்தில் உள்ள மொத்தம் 57,566 பள்ளிகளில், 1,24,02,872 மாணவர்களும், 5,69,909 ஆசிரியர்களும் உள்ளனர்.
புள்ளிவிவரங்கள்
பள்ளி மற்றும் மாணவர் சேர்க்கை புள்ளிவிவரங்கள்
தேசிய அளவில் ஒரு பள்ளிக்குச் சராசரியாக 169 மாணவர்கள் உள்ள நிலையில், தமிழகத்தில் ஒரு பள்ளிக்குச் சராசரியாக 215 மாணவர்களும், 10 ஆசிரியர்களும் உள்ளனர். மேலும், தமிழகத்தின் மாணவர்-ஆசிரியர் விகிதம் 22 ஆக உள்ளது, இது தேசிய சராசரியான 24-ஐ விடச் சிறந்ததாகும். நாட்டின் பெரும்பாலான பகுதிகளை விட தமிழ்நாட்டில் உள்ள குழந்தைகள் நீண்ட காலத்திற்கு தங்கள் கல்வியைத் தொடர்கின்றனர். தமிழகத்தில் மொத்த மாணவர் சேர்க்கை விகிதமானது: தொடக்கக் கல்வியில் 92% (தேசிய சராசரி: 89%) உயர் தொடக்கக் கல்வியில் 95% (தேசிய சராசரி: 90%) இடைநிலைக் கல்வியில் 97% (தேசிய சராசரி: 82%) மேல்நிலைக் கல்வியில் 85% (தேசிய சராசரி: 62%)
இடைநிற்றல் விகிதம்
பூஜ்ஜியமாக குறைந்த பள்ளி இடைநிற்றல் விகிதம்
தமிழகப் பள்ளிக் கல்வித்துறையின் சிறப்பான செயல்பாடுகளால், தொடக்க மற்றும் உயர் தொடக்க நிலைகளில் பள்ளி இடைநிற்றல் விகிதம் முற்றிலும் குறைக்கப்பட்டு பூஜ்ஜியமாக சாதனை படைக்கப்பட்டுள்ளது. அதே வேளையில், இடைநிலைக் கல்வியில் இடைநிற்றல் விகிதம் வெறும் 6.2 சதவீதமாக மட்டுமே உள்ளது. இது 9.5 சதவீதம் என்ற நாட்டின் ஒட்டுமொத்த தேசிய சராசரியை விடக் கணிசமாகக் குறைவாகும். மாணவர்கள் தங்கள் கல்வியைத் தடையின்றித் தொடர, தமிழக அரசு வழங்கி வரும் உயர்தரமான கல்விச் சூழலும் பலதரப்பட்ட நலத்திட்டங்களுமே இந்த வரலாற்றுச் சிறப்புமிக்க முன்னேற்றத்திற்குக் காரணம் எனப் பள்ளிக் கல்வித்துறை பெருமிதத்துடன் தெரிவித்துள்ளது.