தமிழக சட்டப்பேரவை - ஓபிஎஸ் இருக்கையில் எவ்வித மாற்றமும் செய்யப்படவில்லை
செய்தி முன்னோட்டம்
அதிமுக பொதுக்கூட்டத்தில் ஓ.பன்னீர் செல்வம் உள்ளிட்ட சிலரை நீக்கியது செல்லும் என்று அண்மையில் உச்ச நீதிமன்றம் உத்தரவு பிறப்பித்தது.
இதனையடுத்து, அதிமுக'வினர் சட்டப்பேரவை தலைவரான அப்பாவுவை சந்தித்து எதிர்க்கட்சி துணைத்தலைவர் பதவியில் இருந்து நீக்குமாறு கடிதம் அளித்ததாக செய்திகள் வெளியானது.
ஏற்கனவே இவர்கள் 2 முறை இதுகுறித்த கோரிக்கை வைத்தும், இன்று(அக்.,9) துவங்கியுள்ள சட்டப்பேரவை கூட்டத்திலும் எதிர்க்கட்சி துணைத்தலைவருக்கான இருக்கை ஓபிஎஸ்'கே ஒதுக்கப்பட்டுள்ளது.
இதனால் கூட்டம் துவங்குவதற்கு முன்னர் எடப்பாடி கே பழனிசாமி அறையில் எம்எல்.ஏ.க்களுடனான சந்திப்பு நிகழ்ந்தது என்று கூறப்படுகிறது.
அதன்படி மீண்டும் அதிமுகவினர் சட்டப்பேரவை தலைவரை சந்தித்து இந்த விவகாரம் குறித்து கோரிக்கையினை வைத்துள்ளனர்.
சட்டப்பேரவை
பேரவை நிகழ்வுகளை பார்வையிடும் ஆஸ்திரேலியா நாடாளுமன்ற சபாநாயகர்
ஓபிஎஸ் இருக்கையினை, ஆர்.பி.உதயகுமாருக்கு ஒதுக்கவேண்டும் என்று அவர்கள் கோரிய நிலையில், இம்முறையும் எதிர்க்கட்சி துணைத்தலைவர் இருக்கையில் மாற்றம் செய்யப்படாமல் ஓபிஎஸ்'கே ஒதுக்கப்பட்டது.
இதனால் இக்கூட்டத்தில் கலந்துகொள்ளாமல் எடப்பாடி கே பழனிசாமி தனது அறையிலேயே உள்ளார் என்று தகவல்கள் தெரிவிக்கிறது.
இந்நிலையில் இன்றைய பேரவை நிகழ்வுகளை, இந்தியாவுக்கு சுற்றுப்பயணம் மேற்கொண்ட ஆஸ்திரேலியா நாடாளுமன்ற சபாநாயகர் மில்டன் டிக் தலைமையிலான 14 பேர் கொண்ட குழு பார்வையிட்டு வருகிறது என்றும் தகவல்கள் வெளியாகியுள்ளன.
முன்னதாக இக்குழுவினரை, முதல்வர் மு.க.ஸ்டாலின் மற்றும் தமிழக மக்கள் சார்பில் வரவேற்பதாக சபாநாயகர் அப்பாவு தெரிவித்துள்ளார்.
இந்த சட்டப்பேரவை கூட்டத்தில் பல்வேறு முக்கிய முடிவுகள் எடுக்கப்படும் என்று எதிர்பார்க்கப்படும் நிலையில், காவிரி குறித்து முதல்வர் தனித்தீர்மானம் கொண்டுவர உள்ளார் என்றும் கூறப்படுகிறது.