ஆறு வழி சாலை அமைப்பது குறித்து மத்திய அமைச்சருக்கு கடிதம் எழுதிய தமிழக முதல்வர்
செய்தி முன்னோட்டம்
ஸ்ரீ பெரும்பதூர் முதல் வாலாஜாபேட்டை வரையிலான ஆறுவழி சாலை பணிகளை விரைந்து முடிக்க கோரியும், மத்திய அரசின் திட்டங்களை மேற்கொள்ள தமிழக அரசு முழு ஒத்துழைப்பை அளிக்கும் என்றும் மத்திய சாலை போக்குவரத்து மற்றும் நெடுஞ்சாலை துறை அமைச்சர் நிதின் கட்கரிக்கு தமிழக முதல்வர் மு.க.ஸ்டாலின் அவர்கள் கடிதம் ஒன்றினை எழுதியுள்ளார்.
அந்த கடிதத்தில், ஸ்ரீ பெரும்பதூர் முதல் வாலாஜாபேட்டை வரையிலான ஆறுவழி சாலை பணிகளை விரைந்து முடிக்கவேண்டும்.
ஒப்பந்ததாரர்கள் மற்றும் இந்திய தேசிய நெடுஞ்சாலை ஆணையத்திற்கும் இடையே நிலவும் பிரச்சனையால் பணிகள் நடைபெறாமல் இருந்து வருகிறது என்று குறிப்பிட்டுள்ளார்.
அந்த சாலையின் தற்போதைய நிலை மிகமோசமாக உள்ளதால் உடனடியாக இந்த ஆறுவழி சாலை பணிகளை துரிதப்படுத்தி செய்துமுடிக்க உத்தரவிடவேண்டும் என்று கேட்டுக்கொண்டுள்ளார்.
கோரிக்கை கடிதம்
சாலைகளை நல்ல முறையில் பராமரிக்க உத்தரவிட வேண்டும்
இதனை தொடர்ந்து அந்த கடிதத்தில், மேலும் சாலையை நல்ல முறையில் பராமரிக்க இந்திய தேசிய நெடுஞ்சாலை ஆணைய அதிகாரிகளுக்கு அறிவுறுத்த வேண்டும் என்றும் குறிப்பிட்டுள்ளார்.
தொடர்ந்து கடிதத்தில், 2020ம் ஆண்டு டிசம்பர் மாதம் சென்னை உயர்நீதிமன்றம் ஸ்ரீ பெரும்பதூர் மற்றும் சின்னசமுத்திரம் சுங்கச்சாவடிகளில் இதுபோன்ற மோசமான சாலை பராமரிப்பு காரணமாக சுங்கச்சாவடி கட்டணத்தை 50 சதவிகிதமாக குறைத்ததை எடுத்துரைத்துள்ளார்.
இது போன்ற சாலைகளின் மோசமான நிலை பொதுமக்களின் வசதிக்காக பல முயற்சிகளை மேற்கொண்டு வரும் தேசிய நெடுஞ்சாலை ஆணையத்தின் நற்பெயருக்கு களங்கம் விளைவிக்கும் வகையில் அமைகிறது என்றும் அவர் குறிப்பிட்டு எழுதியுள்ளார் என்பது குறிப்பிடத்தக்கது.