சென்னை ராணிமேரி கல்லூரியில் ரவீந்திரநாத் தாகூர் சிலை - தமிழக முதல்வர் திறந்து வைத்தார்
செய்தி முன்னோட்டம்
இந்தியா நாட்டின் தேசிய கீதத்தினை இயற்றியவர் ரவீந்திரநாத் தாகூர்.
தமிழ் வளர்ச்சிதுறை சார்பில் இவரின் பெருமை மற்றும் நினைவினை போற்றும் வகையில் அவரின் முழு உருவச்சிலையினை சென்னை ராணி மேரி கல்லூரி வளாகத்தில் அமைத்துள்ளது.
இந்த சிலையானது ரூ.29.7 லட்சம் மதிப்பில் 7 அடி உயரத்தில் அமைக்கப்பட்டுள்ளது என்று செய்திகள் தெரிவிக்கிறது.
இந்நிலையில் இந்த திருவுருவ சிலையினை இன்று(செப்.,8) தமிழக முதல்வர் மு.க.ஸ்டாலின் திறந்து வைத்து மலர்தூவி மரியாதை செலுத்தினார்.
இந்த சிலை திறப்பு விழா நிகழ்ச்சியில் அமைச்சர்கள் சேகர்பாபு, பொன்முடி, கே.என்.நேரு, மேயர் ப்ரியா ராஜன் உள்ளிட்ட பலர் கலந்துகொண்டனர்.
முதல்வர்
கருணை அடிப்படையிலான பணி நியமன ஆணைகள் வழங்கப்பட்டது
இதனை தொடர்ந்து அவர், விபத்தில் சிக்கியவர்களை மீட்கும் 'வீரா' என்னும் அவசர மீட்பு வாகனத்தின் பயன்பாட்டினை சென்னை தலைமை செயலகத்தில் கொடியசைத்து துவக்கி வைத்துள்ளார் என்றும் கூறப்படுகிறது.
தொடர்ந்து தமிழ்நாடு நுகர்பொருள் வாணிப கழகத்தில் பணிக்காலத்தில் உயிரிழந்த 53 பேர்களின் வாரிசுகளுக்கு கருணை அடிப்படையிலான பணி நியமன ஆணைகளை வழங்கினார்.
பின்னர் மதுரை, புதுக்கோட்டை, ராணிப்பேட்டை உள்ளிட்ட மாவட்டங்களில் ரூ.7.20 கோடி செலவில் கூட்டுறவு, உணவு மற்றும் நுகர்வோர் பாதுகாப்பு துறையின் கீழ் செயல்படும் தமிழ்நாடு சேமிப்பு கிடங்கு நிறுவனம் சார்பில் கட்டப்படவுள்ள சேமிப்பு கிடங்குகளுக்கு அடிக்கல் நாட்டினார் என்பது குறிப்பிடத்தக்கது.