கோவையில் இனி மது வாங்கினால் கூடுதலாக ரூ.10 செலுத்த வேண்டும் - மாவட்ட ஆட்சியர்
செய்தி முன்னோட்டம்
தமிழகத்தின் நீலகிரி மாவட்டத்தில் மதுபான பாட்டில்கள் பொது இடங்களில் இயற்கை சூழல் மற்றும் வனவிலங்குகளுக்கு பாதிப்பு விளைவிக்கும் வகையில் வீசப்படுகிறது என்று தொடர்ந்து புகார்கள் எழுந்தது. இதனை கட்டுப்படுத்தும் விதமாக சென்னை உயர்நீதிமன்றம் டாஸ்மாக் மதுபான பாட்டில்களை திரும்ப பெறும் திட்டத்தினை நடைமுறைப்படுத்த வேண்டும் என்று உத்தரவிட்டது. இத்திட்டம் வெற்றிகரமாக அமல்படுத்தப்பட்டது. இதே போல் பிற மாவட்டங்களிலும் இத்திட்டத்தினை கொண்டு வர உயர்நீதிமன்றம் அறிவுறுத்தியது. அதன்படி, தற்போது இந்த காலி மதுபாட்டில்களை திரும்ப பெறும் திட்டத்தினை கோவையில் வரும் ஏப்ரல் 1ம் தேதி முதல் அமல்படுத்தவுள்ளதாக அம்மாவட்ட நிர்வாகம் தெரிவித்துள்ளது.
ஒத்துழைப்பு கொடுங்கள்
கோவை மாவட்ட ஆட்சியர் அறிக்கை வெளியீடு
இது தொடர்பான அறிக்கையினை கோவை மாவட்ட ஆட்சியர் கிராந்தி குமார் வெளியிட்டுள்ளார். அதன்படி அந்த அறிக்கையில், வரும் ஏப்ரல் 1ம் தேதி முதல் மதுபான கடைகளில் விற்பனை செய்யப்படும் மது பாட்டில்களுக்கு கூடுதலாக ரூ.10 பெறப்பட வேண்டும். இதற்கான ஸ்டிக்கரை மது பாட்டிலிலேயே ஒட்டப்பட்டு தான் விற்பனை செய்ய வேண்டும் என்றும் தெரிவிக்கப்பட்டுள்ளது. மேலும் காலி மது பாட்டில்களை திரும்பவும் மதுபான கடையில் கொடுத்து அந்த ரூ.10யை திரும்ப பெற்று கொள்ளலாம் என்றும் அதில் கூறப்பட்டுள்ளது. இதற்கான ஒத்துழைப்பை மது அருந்துவோர் அளிக்க வேண்டும் என்றும் அந்த அறிக்கையில் ஆட்சியர் கேட்டுக்கொண்டுள்ளார் என்பது குறிப்பிடத்தக்கது.